رۆما، تاران و واشنتۆن کۆدەکاتەوە

ئاژانسەکان

ئاڵای ئێران و ئەمریکا

ئەمڕۆ رۆما دەبێتە خاڵێ کۆکەرەوەی تاران و واشنتۆن، دووەمین دانیشتنی ناراستەوخۆی نێوان وەفدی باڵای کۆماری ئیسلامی ئێران و ویلایەتە یەکگرتووەکانی ئەمریکا لەبارەی بەرنامەی ئەتۆمی ئێران، بەڕێوەدەچێت.

ستیڤ ویتكۆف نوێنەری ئەمریكا بۆ رۆژهەڵاتی ناوەڕاست و عەباس عیراقچی وەزیری دەرەوەی ئێران لە رۆمای پایتەختی ئیتاڵیان و بەر لەدەستپێکردنی كۆبوونەوەكە ستیڤ ویتكۆف رایگەیاند:" هیچ رێككەوتنێك ناكرێت تا ئەوكاتەی تاران پیتاندنی یۆرانیۆم و سیستمی پەرەپێدانی چەك بە تەواوی رانەگرێت"، هاوکات  عیراقچیش دەڵێت:"  تاران سازش لەسەر بەرنامە ئەتۆمییەكە و دابەزاندنی ئاستی پیتاندنی یۆرانیۆم دەكات و نایەوێت چەكی ئەتۆمی بەرهەمبهێنێت، بەڵام داوای هەڵگرتنی سزاكان دەكەین و گفتوگۆ لەسەر دەستبەرداربوونی تەواوەتی لە بەرنامەی ئەتۆمی ناكەین".

خولی یەکەمی دانوستانی نێوان ئەمریکا و ئێران لە رۆژی 12ی ئەم مانگەدا لە  مەسقەتی پایتەختی  شانشینی عوممان بەڕێوەچوو کە خودی عوممان نێوەندگیر بوو.

بۆ خولی دووەمی کۆبوونەوەکان، رافائیل گروسی بەڕێوەبەری گشتیی ئاژانسی نێودەوڵەتیی وزەی ئەتۆم بەشدار دەبێت.

لێدوان و راگەیەنراوەکانی هەریەک لە ئەمریکا و ئێران لەدوای خولی یەکەمی دانوستانەکان ئەرێنی بوون، کۆشکی سپی رایگەیاند:"گفتوگۆکان ئەرێنی و بونیادنەر بوون".

لەلایەکی دیکەشەوە، عەباس عیراقچی وەزیری دەرەوەی ئێران بەهەمان شێوە گفتوگۆکانی بە بونیادنەر ناوبرد".


 PUKMEDIA/ ئاژانسەکان