سەرۆککۆمار: خانەقین گیانی پێکەوە ژیانی نەتەوەیی بەرجەستە دەکات

نووسینگەی راگەیاندنی سەرۆککۆمار

دکتۆر لەتیف جەمال رەشید لە پارێزگای دیالە

سەرۆککۆمار دکتۆر لەتیف جەمال رەشید، دووپاتی کردەوە کە ئەو فرە رەنگییەی کە پارێزگای دیالەی پێ جیا دەکرێتەوە مایەی شانازییە و بەرجەستەی گیانی پێکەوەژیانی نەتەوەیی ڕاستەقینە دەکات، بەو پێیەی نەتەوە و ئایین و مەزهەبی جۆراوجۆر لە خۆ دەگرێت کە بە ئارامی و هاوسەنگی پێکەوە دەژین.

لە میانی دیدارەکەیدا لەگەڵ کەسایەتی هۆز و عەشیرەتەکانی قەزای خانەقین و نوێنەرانی پێکهاتەکانی شارەکە، سەرۆک کۆمار ئاماژەی بەوەکرد کە هۆزەکان ڕۆڵی مێژووییان هەبووە لە پتەوکردنی یەکڕیزی کۆمەڵایەتی و چەسپاندنی پەیوەندی نێوان دانیشتوانەکەی، ئەمە جگە لەوەی بەشداری کاریگەریان لە پاڵپشتیکردنی ئاسایش و سەقامگیریدا هەبووە.

سەرۆککۆمار دووپاتی کردەوە کە ئەرکی نیشتمانی پێویستی بەوەیە هەموو لایەک بە بەرپرسیارانە کاربکەن بۆ پاراستنی ئاسایش و سەقامگیری، هەروەها پاراستنی ئەو دەستکەوتانەی بەدەست هاتوون بە قوربانیدانی رۆڵەکانی گەل لە ڕووبەڕووبوونەوەی تیرۆر، ئاماژەیکرد بە گرنگی بەردەوامیدان بە پرۆسەی بیناسازی و ئاوەدانکردنەوە و پێشکەشکردنی باشترین خزمەتگوزاری بە هاووڵاتیان و کارکردن بۆ باشترکردنی بارودۆخی ژیانیان و دابینکردنی پێداویستیی و داوا ڕەواکانیان.

PUKMEDIA