مه‌كته‌بی سیاسی: ئه‌ركمانه‌ به‌رده‌وام بین له‌كاروانی ئاوه‌دانی قه‌ڵادزێ

PUKMEDIA

لۆگۆى یەکێتیى

مه‌كته‌بی سیاسیی یه‌كێتیی نیشتمانیی كوردستان له‌ ساڵڕۆژی بۆردومانی قه‌ڵادزێ و  زانكۆی سلێمانی كه‌ ئه‌و كاته‌ له‌و شاره‌بووه‌، په‌یامێك بڵاوده‌كاته‌وه‌و ئاماژه‌ بۆ ئه‌وه‌ده‌كات:"جه‌ماوه‌ری قه‌ڵادزێ هه‌میشه‌ پێشه‌نگی قۆناغه‌كانی خه‌بات بوون".


ده‌قی په‌یامه‌كه‌:

له‌یادی تاوانی بۆردومانی قه‌ڵادزێدا كه‌ڕ‌ژێمی به‌عسی رووخاو له‌به‌یانی رۆژی 24ی 4ی 1974دا ئه‌نجامیدا، سه‌ری رێز بۆ رۆحی پاكی گشت شه‌هیدانی ئه‌و كاره‌ساته‌ داده‌نه‌وێنین ،كه‌به‌شێكی  زۆریان خوێندكارو مامۆستای زانكۆی سلێمانی بوون. 
 
وه‌ك  تۆڵه‌ سه‌ندنه‌وه‌ی ئه‌و تاوانه‌ و بۆ رووبه‌ڕ‌ووبونه‌وه‌ی سیاسه‌تی راگواستنی گوندو دێهاته‌كان كه‌ڕ‌ژێمی به‌عس له‌سنوری ئه‌م قه‌زایه‌ به‌چڕ‌ی جێبه‌جێیده‌كردو بۆ به‌ره‌نگاری سیاسه‌ته‌كانی به‌به‌عسیكردن و به‌عه‌ره‌بكردن، له‌ڕ‌ۆژی 24ی 4ی 1982 داو له‌هه‌شته‌مین ساڵیادی تاوانی  بۆردومانه‌كه‌دا، جه‌ماوه‌ری شاری قه‌ڵادزێ و به‌سه‌رپه‌رشتی رێكخستنه‌كانی یه‌كێتی خۆپیشاندانێكی جه‌ماوه‌رییان رێكخست و توانیان ده‌ستبگرن  به‌سه‌ر چه‌ندین  مۆڵگه‌ی دوژمندا، ئه‌م خۆپیشاندانه‌ بووه‌ خه‌باتێكی تری ئه‌و قۆناغه‌و بۆ چه‌ندین رۆژ له‌گشت شاره‌كانی تری كوردستانیشدا ئه‌نجامدرا.

ئه‌مڕۆش له‌م یاده‌دا بۆ به‌زیندووڕ‌اگرتنی ناوی شه‌هیدانی تاوانی بۆردومان و شه‌هیدانی  خۆپیشاندان، بۆ به‌رزڕ‌اگرتنی رۆڵی جوامێریی خه‌ڵكی ناوچه‌كه‌، ئه‌ركی سه‌رشانمانه‌ به‌رده‌وامی  بده‌ین به‌كاروانی ئاوه‌دانی و پێشكه‌شكردنی باشترین خزمه‌تگوزاری به‌جه‌ماوه‌ری قه‌ڵادزێ. 

درود بۆ ڕ‌ۆحی شه‌هیدانی  بۆردومانی قه‌ڵادزێ و گشت شه‌هیدانی  رێگای  تێكۆشان له‌ناوچه‌كه‌دا 
سڵاو له‌جه‌ماوه‌ری قه‌ڵادزێ كه‌ هه‌میشه‌ پێشه‌نگی قۆناغه‌كانی خه‌بات بوون

مه‌كته‌بی سیاسیی 
یه‌كێتیی نیشتمانیی كوردستان
24-4-2025

PUKMEDIA