وەزیری پێشمەرگە: پلاتفۆڕمی دیجیتاڵی تەندروستی دەستكەوتێكی گەورەیە

ئەرشیفی PUKMEDIA

شۆڕش ئیسماعیل وه‌زیری پێشمه‌رگه‌ی حكومه‌تی هه‌رێمی كوردستان

وەزارەتی پێشمەرگە پلاتفۆڕمی دیجیتاڵی تەندروستی راگەیاندو وەزیری پێشمەرگەش دەڵێت: "ئەم گەشەسەندنە لەبواری پزیشكی سەربازیدا دەستكەوتێكی گەورەیە بۆ وەزارەتی پێشمەرگەو هێزی پێشمەرگەی كوردستان، كە ئامانج لێی رێكخستنەوەی تەواوی كاروباری پزیشكی وەزارەتە لەبوارەكانی تەندروستی گشتی و سەرچاوەی مرۆیی و راهێنان و لۆجستی پزیشكی".


ئەمڕۆ دوو شەممە 28-4-2025، شۆڕش ئیسماعیل وەزیری پێشمەرگەی حكومەتی هەرێم پلاتفۆڕمی دیجیتاڵی تەندروستی راگەیاندو ئاماژەی بەوەدا: "ئەم گەشەسەندنە لەبواری پزیشكی سەربازیدا سەركەوتن و بەدەستهێنانی دەستكەوتێكی گەورەیە بۆ وەزارەتی پێشمەرگەو هێزی پێشمەرگەی كوردستان".

راشیگەیاند: "بەدیجیتاڵكردنی كاروباری پزیشكی وەزارەت، بەرنامەیەكی ئەلیكترۆنییە بۆ زانین و هەڵسەنگاندنی ئاستی ئامادەیی پزیشكیی بۆ سەرجەم یەكە سەربازییەكانی وەزارەتی پێشمەرگەو هەڵسەنگاندنی سەرجەم چارەسەرە پزیشكییەكان و ئاگادار بوون لەسەرجەم ئەو حاڵەتانەی كە لەدۆخی ناهەموارو شەڕو ئاشتیدا بۆ یەكە سەربازییەكانی هێزی پێشمەرگە دێنە پێشەوە".

پلاتفۆڕمی دیجیتاڵی تەندروستی ئامانجی سەرەكی بەرنامەی ئەلیكترۆنییە بۆ رێكخستنەوەی تەواوی كاروباری پزیشكی لەوەزارەتی پێشمەرگە لەبوارەكانی تەندروستی گشتی و سەرچاوەی مرۆیی و راهێنانی پزیشكی و لۆجستی پزیشكی، كە رێكخراوێكی ئەمریكی پاڵپشتی دارایی دەكات و لەڕێگەیەوە راستەوخۆ سەرجەم یەكە پزیشكییەكانی وەزارەت بەیەكترەوە دەبەسترێنەوە.

PUKMEDIA