25 فیلم لە فێستیڤاڵی فیلمی کوردیی مۆبایل-دا بەشداریی دەکەن

بەشی راگەیاندنی فێستیڤالەکە

فێستیڤالی فیلمی کوردی مۆبایل 2025

ئێوارەی ئەمڕۆ 5-5-2025 بە مەراسیمی فەرشی سور فێستیڤاڵی فیلمی کوردیی مۆبایل لە سیتی سینەمای سلێمانی بەڕێوەدەچێت کە ماوەی دوو رۆژ دەخایەنێت، ئەندامێکی لیژنەی دادوەرانی فێستیڤالەکەش دەڵێت:" 25 فیلم بەشداری دەکەن، کە سەرجەمیان بە تایبەت بۆ فیستیڤاڵەکە دروستکراون و 10 خەڵاتیش دابەشدەکرێن".

کۆڤان حسێن ئەندامی لیژنەی دادوەرانی فێستیڤاڵی فیلمی کوردیی مۆبایل بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" فێستیڤاڵەکە ماوەی دوو رۆژ دەخایەنێت و ٢٥ فیلم کە سەرجەمیان بە مۆبایل بەرهەمهێنراون کێبڕکێ بۆ بردنەوەی 10 خەڵات دەکەن، وەک باشترین ئەکتەری کوڕ و باشترین ئەکتەری کچ و باشترین سیناریۆ و باشترین وێنەگر و باشترین بەرهەمهێنان...هتد".

" لەسەر چەندین پێوەر فیلمەکان بۆ بەشداری لەفێستیڤاڵەکەدا هەڵبژێردراون و مەرجی سەرەکیش ئەوەبووە کە فیلمەکە کوردی بێت، بۆ ئەوەی بتوانین لەڕێگەی فیلمەوە وەک نەتەوەی کورد زیاتر خۆمان بەوڵاتەکانی تر بناسێنین، جگە لەوەی چیرۆک و ناوەڕۆکی فیلمەکان بەجۆرێک هەڵبژێردراون کە باسی چەند بابەتێکی ناو کۆمەڵگەی کوردی دەکەن" کۆڤان حسێن وایوت.

ئەو ئەندامەی لیژنەی دادوەران ئاماژەی بەوەشکرد:" لە هەڵسەنگاندنەکاندا رەچاوی ئەوەکراوە کە فیلمەکان بە مۆبایل بەرهەمێنراون و فیلمی درێژ نین، هاوکات ئامانجی سەرەکی فێستیڤاڵەکەش دەستگرتنی ئەو فیلمسازانەیە کە رەنگە بە کۆمەڵێک هۆکار نەیانتوانیبێت تواناکانی خۆیان پیشان بدەن و دەمانەوێت ئەو پەیامەش بگەیەنین دەتوانرێت بە مۆبایل بەرهەمهێنان بکرێت نەک کێشەی پێ دروستبکرێت".

ئەمەش لەکاتێکدایە ئەمڕۆ بە مەراسیمی فەرشی سوور فیستیڤالەکە دەستپێدەکات و لەڕۆژی یەکەمدا 13 فیلم و لەڕۆژی دووەمدا 12 فیلم نمایش دەکرێن، هاوکات ماوەی 5 مانگە ئامادەکاری بۆ فێستیڤاڵەکە دەکرێت و لە کۆی 100 فیلم کە تایبەت بۆ فێستیڤاڵەکە دروستکراون، 25 فیلم بۆ بەشداریکردن و کێبڕکێ هەڵبژێردراون و بە فلتەری دوو لیژنەدا تێپەڕیون، لیژنەی هەڵبژاردنی فیلمەکان و لیژنەی دادوەران. 

PUKMEDIA