شەش هەزار خانەنشینی هەرێم مووچەیان بۆ دەبەسترێت

PUKMEDIA

خانەنشینان

تا ئێستا دۆسیەی زیاتر لە 7 هەزار و 500 خانەنشین تەواو بووە، کە لەسەرەتای ئەمساڵ بڕیاری خانەنشین بوونیان دەرچووبوو، لەو ژمارەیەش زیاتر لە 6 هەزار خانەنشین مووچەیان بۆ بەستراوەتەوە.
بەگوێرەی راگەیەندراوێکی وەزارەتی دارایی حکومەتی ھەرێمی کوردستان، بەپێی بڕیاری دادگای باڵای فیدراڵی عیراق و ئەنجومەنی وەزیرانی هەرێمی کوردستان، وەزارەتی دارایی هەرێم، پابەندە بە جێبەجێکردنی یاسای ژمارە 9ی ساڵی 2014 ی خانەنشینی یەکگرتووی عیراق.  

لە کۆبوونەوەیەکی وەزارەتی دارایی رۆژی 6-5-2025  وەزیری دارایی و ئابووری سەرپەرشتی کۆبونەوەیەکی کرد لەسەر دوا هەنگاوەکانی جێبەجێکردنی یاسای ژمارەی 9 خانەنشینی یەکگرتووی عیراق لەسەر ئاستی فەرمانبەرانی شارستانی و هێزەکانی پێشمەرگە و ئاسایشی ناوخۆ.   

 بەگوێرەی راگەیەندراوێکی وەزارەتەکە سەرجەم لایەنە پەیوەندیدارەکان راسپێردران لە نزیکترین کاتدا رێنمایی جێبەجێکردنی یاساکە لەسەر هەموو ئاستەکان ئامادە بکەن بۆ پەسەندکردنی و دواتر گشتاندنی پێبكرێت بۆ سەرجەم وەزارەت و دەستە و دامەزراوەکانی حکومەتی هەرێم.  

هەروەک سەرجەم بەڕێوەبەرایەتیەکانی خانەنشینی راسپێردران کە هەموو توانای خۆیان بخەنە گەڕ تابتوانرێت لە زووترین کاتدا مامەڵەی دۆسیەی خانەنشینان تەواو بکرێت و دواتر بخرێتە لیستی مووچەوە.  

PUKMEDIA