پەرلەمانتارێک: کورتهێنانی بودجەی عیراق 63 ترلیۆن دینارە

PUKMEDIA

دراوی عیراقی

ئەندامێکی لیژنەی دارایی لە ئەنجومەنی نوێنەرانی عیراق ئاشکرایدەکات:"کورتهێنانی بودجە گەیشتووەتە 63 ترلیۆن دینار و دەڵێت:" بۆ هەر ئەگەرێکی دروستبوونی قەیرانی دارایی، حکومەت چەند بژاردەیەکی لە بەردەمدایە و تێیدەپەڕێنێت ".

 حسێن موئنیس ئەندامی لیژنەی دارایی رایگەیاند:"حکومەت چەند بژاردەیەکی لەبەردەمدایە و  دەتوانێت قەیرانەکان تێبپەڕێنێت و پرسی مووچەش  تووشی هیچ گرفتێک نابێت".

" دواکەوتنی حکومەت لە پێشکەشکردنی خشتەکان  ئاماژەیەکی نەرێنییە و نیشانەی  سستییە لەوەڵامدانەوەی گۆڕانکاریی  ئابوریی  جیهانیی ، بەتایبەتی دابەزینی نرخی نەوت و مانەوەی نرخی بەرمیلێک بە 70 دۆلار لە چوارچێوەی بودجەدا کارێکی گونجاو نییە و دەبێت  رای پسپۆڕان بۆ  دەستکاریکردنی وەربگیرێت"، ئەو ئەندامەی لیژنەی دارایی وادەڵێت.

 موئنیس لە لیدوانێکیدا کە لەژمارەی ئەمڕۆی رۆژنامەی سەباح دا بڵاوکراوەتەوە ئاماژەی بەوەشکردووە:  "کورتهێنانی بودجە گەیشتووەتە 63 ترلیۆن دینار،  ئەوەش کورتهێنانێکی زۆرە".

"خشتەی بودجە ئاڵنگارییەکی  قورس و راستەقینەی نوێنەران دەبێت، چونکە دۆخی ئابووری عیراق  پشت بە یەک سەرچاوە دەبەستێت کە نەوتە و وڵات دەخاتە بەردەم ناسەقامگیری بازاڕی جیهانییەوە"، حسێن موئنیس وایوت.

ئەو ئەندامەی لیژنەی دارایی لە ئەنجومەنی نوێنەرانی عیراق راشیگەیاند:" تێپەڕاندنی ئەم ئاڵنگارییانە پێویستی بەڕیوەبردنێکی دارایی دروست و نەخشەڕێگایەکی گونجاوە لەگەڵ باری ئابوری ئێستادا".

PUKMEDIA