ئەنجومەنی دادوەری ئاماری نوێی جێبەجێ كردنی یاسای لێبوردنی گشتی ئاشكرا دەكات

راگەیاندنی ئەنجومەنی باڵای دادوەری عیراق

بینای ئەنجومەنی باڵای دادوەری عیراق

ئەنجومەنی باڵای دادوەری عیراق، ئامارێكی نوێی جێبەجێكردنی یاسای لێبوردنی گشتی ژمارە 27 ی ساڵی 2016 ی هەموار كراوی ئاشكرا كرد.

بەگوێرەی راگەیەندراوێكی ئەنجومەنی باڵای دادوەری عیراق  كە كۆپییەكی دەست PUKMEDIA كەوتووە ئاماژە بەوەكراوە: " لە 1/5/2025 تا 22/5/2025، ژمارەی ئەو كەسانەی بەپێی یاساكە لە بەندیخانە ئازادكراون لە سەرجەم پارێزگاكان گەیشتووەتە  سێ هەزار و 839 كەس و ژمارەی ئەو زیندانیانەشی كە یاساكە دەیانگرێتەوە 11 هەزار و 524 زیندانین".

بە پێی راگەیەندراوەكە، بەهۆی جێبەجێكردنی یاساكەوە، بڕی چوار ملیار و 712 و ملیۆن و 291 هەزار و 591 دینار بۆ خەزێنەی دەوڵەت گەڕێندراوەتەوە.

لە راگەیەندراوەكەدا ئەوەش هاتووە: "بە زیادكردنی ئەم داتایانە بۆ ئاماری پێشوو، كۆی گشتی ئازاد كراوەكان لە بەندیخانە و گرتووخانەكان، 23 هەزار و 220 كەسن، هاوكات كۆی ئەو تۆمەتبارانەی كە فەرمانی دەستگیركردن یان بانگهێشت كردنیان بۆ دەرچووە، 105 هەزا ر و 121 كەسن و بەهۆی جێبەجێكردنی یاساكەوە، بڕی 16 ملیار و 653 ملیۆن و 748 هەزار و 583 دینار بۆ خەزێنەی دەوڵەت گەڕێندراوەتەوە.

PUKMEDIA