دارایی هەرێم بۆ دارایی فیدراڵ: بڕیارەكەتان پێچەوانەی دەستوورە

راگەیاندنی وەزارەتی دارایی و ئابووری

وەزارەتی دارایی هەرێم

وەزارەتی دارایی هەرێم لەبارەی نوسراوەكەی وەزارەتی دارایی عيراقەوە راگەیەندراوێكی بڵاوكردەوە و رایدەگەیەنێت: "ئەو بڕیارە پێچەوانەی دەستووری عیراقە و بەپێی دەستوور دەبێت لە داهاتە فیدراڵییەكاندا داهاتی دادپەروەرانە بۆ هەرێم تەرخان بكرێت".

وەزارەتی دارایی هەرێمی كوردستان، لەبارەی نوسراوەكەی وەزارەتی دارایی عيراق كە بڕیاری راگرتنی مووچەی مووچەخۆرانی هەرێمی لە مانگی ئایارەوە راگەیاندووە، راگەیەندراوێكی بڵاوكردەوە كە كۆپییەكی دەست PUKMEDIA كەوتووە ئاماژە بەوە دەكات: "بڕیاری نەناردنی مووچە، پێچەوانەی بڕگەی سێیەمی ماددەی 121ی دەستووری عیراقە، كە بەپێی ئەو ماددەیە پێویستە لە داهاتە فیدراڵییەكاندا داهاتی دادپەروەرانە بۆ هەرێمەكان و پارێزگاكان تەرخان بكرێت".

ئاماژە بەوەشدەكات: "بڕیاری دادگای فیدراڵی بە ژمارە (224 و بەشەكانی 269/ فیدراڵی/2023) پێداگری لە خەرجكردنی مووچەی فەرمانبەران و خانەنشینانی هەرێمی كوردستان دەكات".

ئەوەشخراوەتەڕوو: "بۆ ئەم 8 مانگەی ساڵی 2025، 9 ترلیۆن و 110 ملیار و 835 ملیۆن دینار ماوە لەلایەن حكومەتی فیدراڵییەوە بۆ مووچەخۆرانی هەرێمی كوردستان بنێردرێ كە تاكوو ئێستا نەنێردراوە".

لە راگەیەندراوەكەدا ئەوەشخراوەتەڕوو: "بەپێی دەستوور و بڕیاری دادگاری فیدراڵی، پێویستە وەزارەتی دارایی عيراق لەسەر ناردنی مووچە بەردەوام بێت. بەتایبەت كە لە ساڵی 2013ەوە هەرێمی كوردستان لە میلاكاتی نوێ و پلەی نوێ بێبەش كراوە، بەبێ رەچاوكردنی دادپەروەری لەگەڵ بەشەكانی تری عيراق، هەروەك چۆن حكومەتی فیدراڵی بە قەرەبووی قوربانییانی پڕۆسەكانی ئەنفال و جینۆسایدی بەكۆمەڵی كورد و قوربانییانی چەكی كیمیایی هاووڵاتییانی هەرێمی كوردستان هەڵنەستاوە، لە بەرانبەردا هەموو پاساوێك بۆ نەناردنی مووچەی خەڵكی كوردستان بەكار دەهێنن".

PUKMEDIA