سه‌رۆك كۆمار: یه‌كێتی دژ به‌ دیكتاتۆرییه‌ت قوربانی گه‌وره‌ی داوه‌

نوسینگەى راگەیاندنى سەرۆک کۆمارى عیراق

د.لەتیف جەمال رەشید سەرۆک کۆمارى عیراق

د. له‌تیف جه‌مال ره‌شید سه‌رۆك كۆماری عیراق به‌بۆنه‌ی ساڵیادی یۆبیلی زێڕ‌ینی دامه‌زراندنی یه‌كێتیی نیشتمانیی كوردستانه‌وه‌ گه‌رمترین پیرۆزبایی ئاراسته‌ی سه‌ركردایه‌تی و كادر و لایه‌نگرانی یه‌كێتی ده‌كات كه‌ ئه‌مه‌ ده‌قه‌كه‌یه‌تی...

به‌بۆنه‌ی ساڵیادی یۆبیلی زێڕ‌ینی دامه‌زراندنی یه‌كێتیی نیشتمانیی كوردستانه‌وه‌ گه‌رمترین پیرۆزبایی ئاراسته‌ی سه‌ركردایه‌تی و كادر و لایه‌نگرانی یه‌كێتی ده‌كه‌ین.

دامه‌زراندنی یه‌كێتیی نیشتمانیی كوردستان له‌ 1 ی حوزه‌یرانی 1975 وه‌رچه‌رخانێكی گه‌وره‌ بوو، له‌ بزووتنه‌وه‌ی رزگاریخوازی و خه‌باتی شۆڕ‌شگێڕ‌انه‌، به‌ سه‌ركردایه‌تی سه‌رۆك مام جه‌لال كه‌ رۆڵی سه‌ره‌كی هه‌بوو له‌ كۆكردنه‌وه‌ و رێكخستنی ریزه‌كانی پارته‌ سیاسییه‌كانی كوردستان و عیراق له‌ هه‌لومه‌رجێكی سه‌ختدا له‌ نێو ته‌حه‌دا و هاوكێشه‌ ناوچه‌یی و نێوده‌وڵه‌تییه‌كاندا و یه‌كێتی له‌ خه‌باتی دژ به‌ دیكتاتۆرییه‌ت قوربانی گه‌وره‌ی داوه‌ له‌پێناو به‌دیهێنانی ئازادی و دیموكراسی و ژیانێكی شایسته‌ بۆ كۆمه‌ڵانی خه‌ڵك.

له‌م بۆنه‌یه‌دا هیوای پێشكه‌وتن و سه‌ركه‌وتنی زیاتر بۆ یه‌كێتی ده‌خوازین،له‌جێبه‌جێكردنی ئه‌ركه‌ نیشتمانییه‌كه‌ی كه‌ له‌باوه‌ڕ‌ی یه‌كڕ‌یزیی نێوان هه‌موو هێزه‌ سیاسییه‌كان و كاركردن بۆ خزمه‌تكردنی هاوولاتیان سه‌رچاوه‌ی گرتووه‌.

داوا له‌هه‌مووان ده‌كه‌ین پارێزگاری له‌ ده‌ستكه‌وته‌كان بكه‌ن و به‌ره‌و پێشه‌وه‌ بڕ‌ۆن، له‌پێناو به‌هێزكردنی سیسته‌می دیموكراسی و خزمه‌تكردنی سه‌رجه‌م پێكهاته‌كانی كوردستان و عیراق له‌پێناو بونیاتنانی ده‌وڵه‌تێكی پێشكه‌وتوو، شارستانی، خۆشگوزه‌رانی و دوور له‌توندوتیژی و په‌راوێزخستن و هه‌مووان تێیدا به‌ ئارامی، خۆشگوزه‌رانی و ئاشتی بژین.

به‌رز و پیرۆز بێت ساڵیادی دامه‌زراندنی یه‌كێتی نیشتمانیی كوردستان

سڵاو له‌گیانی پاكی شه‌هیدانی كوردستان و عیراق

د. له‌تیف جه‌مال ڕ‌ه‌شید
سه‌رۆك كۆمار

31/5/2025

PUKMEDIA