شارەزایەكی یاسایی: پێدانی قەرز و سولفە بە هەرێم دەستوورییە

PUKMEDIA

دراوی عیراقی

شارەزایەكی یاسایی رایدەگەیەنێت: "پێدانی پارە بە هەرێمی كوردستان بەشێوەی قەرز بێت یاخود سولفە، یەكێكە لە دەسەڵاتەكانی ئەنجومەنی وەزیرانی عیراق و هیچ پێشێلكارییەكی یاسایی و دەستووری تێدا نییە و دژی یاسا و بڕیارەكانی دادگای فیدراڵیش نییە".

عەلی ئەلتەمیمی شارەزای یاسایی بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بەپێی دەستووری عیراق، حكومەتی فیدراڵی دەتوانێت قەرز یاخود سولفە بە هەرێم بدات بۆ ئەوەی مووچەی مانگی ئایاری مووچەخۆرانی پێدابەش بكات و ئەو بڕیارە دژی هیچ یاسا و بڕیارێكی دادگای باڵای فیدراڵی عیراق نییە".

"پاش پێدانی قەرز بێت یاخود سولفە بە هەرێمی كوردستان، هەردوو حكومەت دەتوانن بەپێی بڕیارەكانی دادگای فیدراڵی عیراق، لەسەر داهاتی نەوتی و نانەوتی رێكبكەون و دواتر بڕی ئەو پارەیە لە پشكی هەرێمی كوردستان ببڕدرێت" عەلی ئەلتەمیمی وادەڵێت.
وتیشی: "ئەم قەرزە هیچ پێشێلكارییەكی یاسایی و دەستووری تێدا نییە و یەكێكە لە دەسەڵاتەكانی ئەنجومەنی وەزیرانی عیراق، هاوكات یەكەمجاریش نییە سولفە بە هەرێم دەدرێت، پێشتریش حكومەتی محەمەد شیاع سودانی بۆ دابەشكردنی مووچە، چەند جارێك پارەی بەشێوەی سولفە بە هەرێمی كورددستان داوە".

عەلی ئەلتەمیمی راشیگەیاند: "پێدانی پارە بە هەرێمی كوردستان، بەشێوەی قەرز بێت یاخود سولفە چارەسەرێكی كاتییە بۆ كێشەی مووچەی مووچەخۆرانی هەرێم، بەتایبەت كە ئێستا هاووڵاتیان لە جەژنی قوربان نزیك بوونەتەوە و پێویستی زیاتریان بە مووچەیە".

پێشتریش كاروان یاروەیس بڕیاردەری فراكسیۆنی یەكێتی لەئەنجومەنی نوێنەرانی عیراق، بەوێبسایتی رەسمیی یەكێتیی نیشتمانیی كوردستان PUKMEDIA ی راگەیاند: "بەپێی یاسا و دەستووری عیراق، حكومەتی فیدراڵی دەتوانێت بڕێك پارە لە شێوەی قەرز یاخود سولفە بۆ هەرێم بنێرێت".

هاوكات ئەمڕۆ 3-6-2025، ئەنجومەنی وەزیرانی عیراق كۆدەبێتەوە و یەكێك لە تەوەرەكانی كۆبوونەوەكەش گفتوگۆكردن دەبێت لەبارەی پێدانی پارە بە هەرێمی كوردستان بۆ دابەشكردنی مووچەی مانگی ئایار.


ئەمەش لەكاتێكدایە، رۆژی 28ی5ی2025 وەزیری دارایی عیراق بڕیاریدا چیتر مووچە بۆ هەرێم نەنێرێت، هۆكارەكەشی گەڕاندەوە بۆ ئەوەی كە پشكی هەرێم لەبودجەی سێ ساڵی رابردوو، كە لەپەرلەمانەوە پەسند كراوە بۆ ساڵەكانی 2023 و 2024 و 2025 تەواوبووە، بەشێك لە لایەنە كوردستانیەكانی-ش بڕیارەكەیان بەنادەستووری ناوبرد.

PUKMEDIA