لە چوار رۆژدا زیاتر لە 300 هەزار گەشتیار سەردانی هەرێمیان کردووە

ئەرشیف

جێگەیەکی گەشتیاریی لەهەرێمی کوردستان

لە پشووەکانی جەژنی قوربانی ئەمساڵدا زیاتر لە 300 هەزار گەشتیار روویان لە پاریزگاکانی هەرێمی کوردستان کردووە و هەڵەبجە لە ریزبەندی یەکەمدایە کە 100 هەزار گەشتیار لەو پارێزگایە بوون، وتەبێژی دەستەی گەشتوگوزاریش دەڵێت:" زیاتر لەوەی چاوەڕێمان دەکرد گەشتیار هاتوون و پلانی دەستەکەشمان سەرکەوتوو بوو".

ئیبراهیم عەبدولمەجید وتەبێژی دەستەی گەشتوگوزاری هەرێمی کوردستان رایگەیاند:" پلانی دەستەی گەشتوگوزاری هەرێم بۆ جەژنی قوربان بە سەرکەوتوویی جێبەجێکرا، بەپێی ئەو  ئامارانەی وەرمانگرتوون ،زۆر دڵخۆشکەرن و رێژەکە زۆر لەوە زیاترە پێشبینیمان کردبوو کە 300 هەزار گەشتیار بێن بۆ هەرێمی کوردستان".

"زۆربەی گەشتیارەکان لە باشوور و ناوەڕاستی عیراق-ەوە هاتوون و لە دەرەوەش گەشتیار هاتوون، کە هەر شارێکی هەرێم تایبەتمەندی خۆی هەیە، هاوکات لە هەرێمی کوردستان زیاتر لە 3 هەزار شوێن و بنکەی گەشتیاریی هەیە و بەڕووی گەشتیاران-دا کراوەن" وتەبێژی دەستەکە وایوت.

هەروەها بەڕێوەبەرایەتی گشتی گەشتوگوزاری هەڵەبجە راگەیەنراوێکى بڵاوکردەوە و رایگەیاند: "لە رۆژانی جەژنی قوربان-دا زیاتر لە 100 هەزار گەشتیار سەردانی ناوچە گەشتیارییەکانی پارێزگای هەڵەبجەیان کردووە".

بەوپێیە ئەگەر زیاتر لە 300 هەزار گەشتیار سەردانی پارێزگاکانی هەرێمیان کردبێت و 100 هەزاریان بۆ شوێنەگەشتیارییەکان هاتبن، ئەوا هەڵەبجە لەڕیزبەندی یەکەمی گەشتیاراندایە و بە هەرسێ پارێزگاکەی دیکەی هەرێم ( هەولێر، سلێمانی، دهۆک) زیاتر لە 200 هەزار گەشتیار سەردانیان کردووە.

PUKMEDIA