كۆمسیۆن پێویستی به‌ 20 هه‌زار كارمه‌ندی دیكه‌یه‌

PUKMEDIA

لۆگۆى کۆمسیۆن

بۆ به‌ڕێوه‌بردنی هه‌ڵبژاردنی داهاتووی په‌رله‌مانی عیراق، كۆمسیۆن پێویستی به‌ 250 هه‌زار كارمه‌نده ‌و ده‌رگای ناو تۆمار كردنیشی بۆ وه‌رگرتنی كارمه‌ندان كردوه‌ته‌وه‌، وته‌بێژی كۆمسیۆنیش ده‌ڵێت: " هێشتا نزیكه‌ی 20 هه‌زار كارمه‌ندان پێویسته‌ بۆ راپه‌ڕاندنی پرۆسه‌كه‌".

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كان به‌ PUKMEDIA ی راگه‌یاند: "تائێستا زیاتر له‌ 230 هه‌زار كه‌س داواكارییان بۆ كارمه‌ندی سه‌ر سندوقی ده‌نگدان پێشكه‌شكردووه‌، به‌ڵام كۆمسیۆن بۆ راپه‌ڕاندنی هه‌ڵبژاردنه‌كه‌ پێویستی به‌ 250 هه‌زار كارمه‌ند هه‌یه‌ و هێشتا نزیكه‌ی 20 هه‌زار كارمه‌ندان پێویسته‌".

"هێشتا ده‌رگای ناو تۆمار كردن دانه‌خراوه‌ و ئه‌و كه‌سانه‌ی خوازیارن وه‌ك كارمه‌ندی كۆمسیۆن به‌شداری هه‌ڵبژاردنی داهاتووی عیراق بكه‌ن، ده‌توانن ئه‌و فۆڕمه‌ ئه‌لكترۆنییه‌ پڕبكه‌نه‌وه‌ كه‌ پێشتر بڵاومان كردبووه‌وه‌"، جومانه‌ غه‌لای واده‌ڵێت.

هه‌روه‌ها كۆمسیۆنی باڵای هه‌ڵبژاردنه‌كان له‌ راگه‌یه‌ندراوێكیدا بڵاویكردووه‌: "بۆ ئاماده‌كاری ئه‌نجامدانی هه‌ڵبژاردنه‌كان له‌ رۆژی 11ی11ی2025، به‌پێی پێوه‌ره‌ نێوده‌وڵه‌تییه‌كان كۆمسیۆن پێویستی به‌ نزیكه‌ی 250 هه‌زار كارمه‌ندی سه‌ر سندوقه‌كان هه‌یه‌".

له‌لایه‌كی دیكه‌وه‌، عه‌لی ساڵح جه‌عفه‌ر سه‌رۆكی لیژنه‌ی هه‌ڵبژاردنی كارمه‌ندانی سه‌رسندوقه‌كانی ده‌نگدان رایگه‌یاندوه‌: "داوایان له‌ نوسینگه‌ی سه‌رۆكوه‌زیرانی عیراق كردوه‌ ره‌زامه‌ندی بده‌ن له‌سه‌ر ده‌ركردنی نوسراوی سوپاسنامه‌، بۆ ئه‌و فه‌رمانبه‌رانه‌ی وه‌كو كارمه‌ند به‌شداری له‌هه‌ڵبژاردنه‌كه‌دا ده‌كه‌ن".

به‌پێی راگه‌یه‌نراوی كۆمسیۆنی باڵای سه‌ربه‌خۆی هه‌ڵبژاردنه‌كان، زۆرترین داواكاری بۆ بوون به‌ كارمه‌ندی سه‌ر سندوقه‌كانی ده‌نگدان له‌ به‌سره‌ تۆمار كراوه‌ كه‌ زیاتر له‌ 21 هه‌زار كه‌س بووه‌، هه‌روه‌ها كه‌مترین داواكارییش له‌ پارێزگای موسه‌ننا بووه‌ کە ژمارەیان‌ سێ هه‌زار كه‌سبووە".

PUKMEDIA