داوا له ‌ئێران ده‌كرێت بنكه‌كانی ئه‌مریكا له ‌عیراق نه‌كاته‌ ئامانج

ئاژانسەکان

ئاڵاى ئەمریکا

عیراق داوا له‌ئێران ده‌كات كه‌ به‌رژه‌وه‌ندییه‌كانی ئه‌مریكا له‌ عیراق نه‌كاته‌ ئامانج و له‌ بەرامبه‌ریشدا ئێرانییه‌كان به‌ڵێنی ئه‌رێنی به‌ عیراق ده‌دەن.

به‌رپرسێكی باڵای ئه‌منی عیراق به‌ ئاژانسی فرانس پرێسی ر‌اگه‌یاندووه‌: "به‌غدا داوای له‌تاران كردووه‌ به‌رژه‌وه‌ندییه‌كانی ئه‌مریكا له‌ عیراق نه‌كاته‌ ئامانج، ئه‌مه‌ش له‌كاتێكدایه‌ كه‌ له‌ نێوان ئێران و ئیسرائیلدا جه‌نگ دروستبووه"‌.

ئاژانسی فرانس پرێس ر‌ۆژی شه‌ممه‌ 14ی حوزه‌یرانی 2025 له‌ زاری به‌رپرسێكی باڵای ئه‌منی عیراقه‌وه‌ بڵاویكرده‌وه‌، "عیراق به‌ره‌سمی داوای له‌ ئێران كردووه‌ كه‌ به‌رژه‌وه‌ندییه‌كانی ئه‌مریكا له‌سه‌ر خاكه‌كه‌ی نه‌كاته‌ ئامانج، ئێرانییه‌كانیش به‌ڵێنی ئه‌رێنیان پێداوین".

ئه‌و به‌رپرسه‌ راشیگه‌یاندوه‌: "ئێران له‌ داواكارییه‌كه‌ی عیراق تێده‌گات و نایانه‌وێت پریشكی جه‌نگ به‌ر عیراق بكه‌وێت".

ئه‌و داوایه‌ی عیراق دوای ئه‌وه‌دێت كه‌ له‌چه‌ند رۆژی رابردوودا هه‌ڕ‌ه‌شه‌ی له‌ ئه‌مریكا كردبوو كه‌ بنكه‌كانی ئه‌مریكا له‌ ر‌ۆژهه‌ڵاتی ناوه‌ڕ‌است ده‌كاته‌ ئامانج له‌ ئه‌گه‌ری زیادبوونی ر‌وودانی ناكۆكی له‌گه‌ڵ ئیسرائیلدا.

ئه‌و به‌رپرسه‌ ئه‌منییه‌ی عیراق باسی له‌وه‌شكردوه‌: "هه‌موو لایه‌نه‌كانی عیراق هاوكاری حكومه‌تن بۆئه‌وه‌ی عیراق  له‌ ململانێكان دووربخرێته‌وه‌".

ئه‌مریكا نزیكه‌ی دوو هه‌زار و 500 سه‌ربازی له‌ عیراق و نزیكه‌ی 900 سه‌ربازی له‌سوریا هه‌یه،‌ كه ‌له‌ چوارچێوه‌ی هاوپه‌یمانییه‌كی نێوده‌وڵه‌تیی له‌ساڵی 2014 دا بۆ به‌ره‌نگاربوونه‌وه‌ی ر‌ێكخراوی تیرۆرستی داعش هێناونێتییه‌ ئه‌و دوو وڵاته‌.

هاوكات رۆژی چوارشه‌ممه‌ی هه‌فته‌ی رابردوو ئه‌مریكا به‌هۆكاری ئه‌منی ژماره‌ی كارمه‌ندانی باڵیۆزخانه‌كه‌ی له‌به‌غدا كه‌مكرده‌وه ‌و ره‌وانه‌ی وڵاته‌كه‌ی كردنه‌وه‌.

PUKMEDIA