چوار دەوڵەت لەسەر "هێڵى تەلەفۆن" لە هەوڵى راگرتنی شەڕدان

جیهان 10:41 AM - 2025-06-15

روسیا و ئەمریکا، سعودیە و تورکیا، لە دوێنێوە لە سەرهێڵی تەلەفۆن و بە دیپلۆماس-یش کار بۆ راگرتنی و خاوکردنەوەی شەڕ و گرژییەکانی نیوان تاران و تەلئەبیب دەکەن و لە سەر ئاستی باڵا و کەسی یەکەم جوڵەی دیپلۆماسیان دەستپێکردوە، تاوەکو جووڵەی شەڕ و سەربازی رابگرن و نیەتی نیوەندگیرییان راگەیاندووە.

 جەڕەسی تەلەفۆنەکەی ترەمپ

ئێوارەی دوێنێ 14ى 6ى 2025 جەڕەسی تەلەفۆنی دۆناڵد ترەمپ سەرۆکی ئەمریکا لێیدا و پەیوەندییەکە لەلایەن هاوتا روسیەکەیەوە ڤلادیمیێر پوتن سەرۆکی روسیاوە بوو.

بەگوێرەی راگەیەندراوێکی کرملن لەزاری یوری ئوشاکۆڤ یاریدەدەری سەرۆک کۆماری روسیا ئاشکرایکرد، لە پەیوەندییەکی تەلەفۆنی نێوان سەرۆک ڤلادیمیێر پوتن و سەرۆک دۆناڵد ترەمپ-دا باسی بارودۆخی نێوان ئێران و ئیسرائیل کراوە.

یوری ئوشاکۆڤ یاریدەدەری سەرۆک کۆماری روسیا دەڵێت: "سەرۆک پوتن لە وتووێژی لەگەڵ سەرۆک ترەمپ ئیدانەی ئۆپەراسیۆنی سەربازیی ئیسرائیلی بۆ سەر ئێران كرد و دۆناڵد ترەمپ دۆخی دەوروبەری ئیسرائیل و ئێرانی بە لە رادەبەدەر نیگەرانکەر وەسفکردووە".

"سەرۆک پوتن ئامادەیی روسیای بۆ نێوەندگیری نێوان ئیسرائیل و ئێران بۆ سەرۆکی ئەمریکا دەربڕی" ئوشاکۆڤ وایوت.

جارێکی دیکە جەڕەسى تەلەفۆنی ترەمپ لێیدا

هەر شەوی رابردوو جارێکى دیکە زەنگی تەلەفۆنەکەی سەرۆکی ئەمریکا لێیدا و پەیوەندییەکە لەلایەن رەجەب تەیب ئەردۆگان-ەوە بوو، ئەویش ئامادەیی ئەنکەرەی بۆ نیوەندگیری راگەیاند.

بەگوێرەی زانیارییەکانی ئەو پەیوەندییە تەلەفۆنییەی دوێنێ شەو میدیای تورکیا ئاشکرایکردوە، ئەردۆگان پاڵپشتیی تورکیاى دەربڕیوە بۆ دانوستانی ئەتۆمی واشنتۆن و تاران و بە پێویستی زانیوە کە دانوستانەکان بەردەوام بن، بۆ چارەسەرکردنی ناکۆکییەکان و رایگەیاندووە: "ئەنکەرە ئامادەیە هەموو هەنگاوێک بۆ ئەو ئامانجە بنێت، تاوەکو رێ لە پەرەسەندنی گرژییەكان لە ناوچەکە بگیرێت".

پەیوەندی تەلەفۆنی پزیشکیان و شازادە سەلمان

محەمەد بن سەلمان، شازادەی جێنشینی سعودیە لەمیانەی پەیوەندییەكی تەلەفۆنی لەگەڵ مەسعود پزیشكیان سەرۆك كۆماری ئێران، سەركۆنەی هێرەشەكانی ئیسرائیلی بۆ سەر ئەو وڵاتەكرد و رایگەیاند، بەكارهێنانی هێز بۆ یەكلاییكردنەوەی ناكۆكییەكان رەتدەكەینەوە.

ئەمجارە جەڕەسی تەلەفۆنەکەی مەسعود پزیشکیان سەرۆک کۆماری ئێران، لێیدا و پەیوەندییەکەش لەلایەن محەمەد بن سەلمان شازادەی جێنشینی سعودییە و سەرۆك وەزیرانەوە بوو.

ئاژانسی رۆژنامەوانی سعودیە (SPA) لە راگەیەندراوێكدا هەندێک وردەکاری پەیوەندییەکەی بڵاوكردەوە، کە شازادە سەلمان جەختییکردەوە، وڵاتەكەی بەكارهێنانی هێز بۆ چارەسەری ناكۆكییەكان رەتدەكاتەوە و گفتوگۆ وەك بنەمایەك بۆ چارەسەری ناكۆكییەكان بەپێویست دەزانێت و دەڵێت: "ئەو هێرشانە چارەسەری قەیرانەكەیان پەكخستوە و بەربەستن لەبەردەم چارەسەری دیپلۆماسیدا".

بڕیاربوو، ئەمڕۆ یەکشەممە 15ى 6ى 2025 خولێکی دیکەی دانیشتنی وەفدی تاران و واشنتۆن لە مەسقەت پایتەختی عوممان بەڕێوەبچێت لە بارەی دۆسیەی ئەتۆمی ئێران، بەڵام بەهۆی گرژییەکانی تاران و تەلئەبیبەوە راگیران، ئەمریکاش لەزاری دۆناڵد ترەمپەوە رایگەیاند:" دەرگای گفتوگۆ و دانوستان لەبەردەم تاران دا کراوەیە و هەرکاتیک ویستی دانیشتنەکان دەستپێدەکەنەوە".

PUKMEDIA \ ئاژانسەکان