سه‌رۆككۆمار داوای چاره‌سه‌ری كۆتایی كێشه‌ی مووچه‌ ده‌كات

راگەیاندنی سه‌رۆككۆماری عیراق

سه‌رۆككۆماری عیراق پێشوازی له‌سه‌رۆكی دادگای فیدراڵی كرد

سه‌رۆككۆماری عیراق پێشوازی له‌سه‌رۆكی دادگای فیدراڵی كرد و سه‌رۆككۆمار ته‌ئكیدی كرده‌وه‌،"كه‌ گرنگه‌ چاره‌سه‌ری كۆتایی بۆ خه‌رجكردنی مووچه‌ی مووچه‌خۆرانی هه‌رێم بدۆزرێته‌وه‌".

د.له‌تیف ره‌شید سه‌رۆككۆماری عیراق له‌گه‌ڵ جاسم محه‌مه‌د عه‌بود سه‌رۆكی دادگای باڵای فیدڕ‌اڵی كۆبووه‌وه‌ و له‌ كۆبوونه‌وه‌كه‌دا سه‌رۆككۆمار باسی له‌وه‌كرد، گرنگه‌ به‌ پشتبه‌ستن به‌ ده‌ستوور و یاسا و بڕ‌یاره‌كانی دادگای فیدڕ‌اڵی، چاره‌سه‌ری كۆتایی بۆ خه‌رجكردنی مووچه‌ی مووچه‌خۆران و ئه‌م دۆسیه‌ مرۆییه‌ بدۆزرێته‌وه‌".

له‌میانه‌ی دیداره‌كه‌دا باسیان له‌ رێگاكانی پاراستنی هه‌ماهه‌نگی و هاوكاری نێوان سه‌رۆكایه‌تی كۆمار و دادگای فیدراڵی كرد بۆ به‌دیهێنانی یه‌كگرتوویی نێوان ده‌سه‌ڵاتداران، سه‌رۆك كۆمار جه‌ختی له‌ به‌هێزكردنی سه‌روه‌ری یاسا و سه‌ربه‌خۆیی ده‌سه‌ڵاتی دادوه‌ری كرده‌وه‌، به‌و پێیه‌ی زامنی چاره‌سه‌ركردنی هه‌موو ناكۆكیيه‌كانه‌.

هاوكات سه‌رۆكی دادگای فیدراڵی جه‌ختی كردووه‌ته‌وه‌ له‌چاره‌سه‌ركردنی قه‌یرانی مووچه‌ی مووچه‌خۆرانی هه‌رێم به‌پێی یاسا.

ئه‌وه‌شی خستووه‌ته‌ڕوو: "دادگاكه‌ به‌پێی یاسا و ده‌ستوور ئه‌ركه‌كانی جێبه‌جێ ده‌كات و تیایدا گه‌ره‌نتی ماف و به‌رژه‌وه‌ندییه‌كانی گه‌ل ده‌كات و یه‌كێتی خاكی عیراق ده‌پارێزێت".

PUKMEDIA