ئەمڕۆ ئەنجومەنی نوێنەرانی عیراق دانیشتنێکی نائاسایی ئەنجام دەدات

PUKMEDIA

ئەنجومەنی نوێنەرانی عیراق

بڕیارە ئەمڕۆ 17ی6ی2025 ئەنجومەنی نوێنەرانی عیراق لەسەر جەنگی نێوان ئیسرائیل و ئێران دانیشتنێکی نائاسایی ئەنجام بدات.

بەپێی راگەیەندراوێکی نوسینگەی راگەیاندنی ئەنجومەنی نوێنەرانی عیراق، دانیشتنەکە نائاسایی دەبێت و تایبەت دەبێت بە" هێرشی ئیسرائیل بۆ سەر کۆماری ئیسلامی ئێران و بەزاندنی ئاسمانی عیراق لەلایەن ئەو وڵاتەوە".


لەو بارەیەوە چرۆ حەمە شەریف ئەندامی ئەنجومەنی نوێنەرانی عیراق لە فراکسیۆنی یەکێتی،  بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند:"ئەنجامدانی کۆبوونەوەی نائاسایی پەرلەمان لەسەر داوای 55 پەرلەمانتارە، کە یاداشتێکیان ئاڕاستەی سەرۆکایەتی ئەنجومەنەکە کردووە و داوای دانیشتنێکی نائاساییان کردووە".

" ئەو 55 پەرلەمانتارە، لە زۆربەی فراکسیۆنەکانی پەرلەمانن و داوایان کردووە ئاسمانی عیراق بەکارنەهێنرێت بۆ هێرشکردنە سەر هیچ وڵاتێک"، چرۆ حەمە شەریف وایوت .

هاوکات بەدرییە حسێن ئەندامی ئەنجومەنی نوێنەرانی عیراق لەفراکسیۆنی یەکێتی بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەئێستادا ئەنجومەنی نوێنەرانی عیراق لەپشووی هاوینەدایە و 5ی7ی2025، دانیشتنەکانی دەستپێدەکاتەوە".

" بەڵام بەهۆی ئەم بارودۆخەی ئێستا و لەسەر داوای 55 پەرلەمانتار، کە داوای دانیشتنی نائاساییان کرد، بۆ گفتووگۆ کردن لەسەر جەنگی نێوان ئیسرائیل و ئێران، بڕیاردرا ئەمڕۆ کۆبوونەوەیەکی نائاسایی ئەنجام بدرێت"، بەدرییە حسێن وایوت. 


PUKMEDIA