حكومه‌ت بۆ درێژكردنه‌وه‌ی كاتی لێخۆشبوونی سزای هاتووچۆ كۆده‌بێته‌وه‌

میدیاکان

لۆگۆى حکومەتى هەرێم

ئه‌مڕۆ چوارشه‌ممه‌ 18ی 6ی 2025، ئه‌نجومه‌نی وه‌زیران كۆده‌بێته‌وه‌ و سێ بڕ‌گه‌ تاوتوێده‌كات، كه‌ گفتوگۆ له‌باره‌ی لێخۆشبوون له‌سزای سه‌رپێچی هاتووچۆ به‌ ڕ‌ێژه‌ی 20% و دامه‌زراندنی ده‌رچوانی كۆلێجی پزیشكی گشتی ده‌كرێت.

به‌پێی راگه‌یه‌نراوێكی حكومه‌تی هه‌رێمی كوردستان، له‌ بڕ‌گه‌ی یه‌كه‌مدا دوایین دۆخی ناوچه‌كه‌ و شه‌ڕ‌ و ئاڵۆزی و پێشهاته‌ سیاسی و سه‌ربازی و ئه‌منییه‌كان و كاریگه‌رییه‌كانی له‌سه‌ر هه‌رێمی كوردستان گفتوگۆ ده‌كرێت.

له‌ بڕ‌گه‌ی دووه‌مدا پێشنیاری وه‌زاره‌تی ناوخۆ تایبه‌ت به‌ درێژكردنه‌وه‌ی كاركردن به‌ بڕ‌یاری ئه‌نجومه‌نی وه‌زیران بۆ لێخۆشبوون له‌ سزای سه‌رپێچیی هاتووچۆ به‌ ر‌ێژه‌ی 20% بۆ شه‌ش مانگی دیكه‌ (1ی ته‌مووزی 2025 تا 31ی كانوونی یه‌كه‌می 2025) گفتوگۆ ده‌كرێت.

له‌ بڕ‌گه‌ی سێیه‌مدا، به‌دواداچوون ده‌كرێت بۆ بڕ‌یاری پێشووی ئه‌نجومه‌نی وه‌زیران له‌ كۆبوونه‌وه‌ی ژماره‌ 159 له‌ ر‌ێكه‌وتی 19ی ئاداری 2025 تایبه‌ت به‌ دامه‌زراندنی ده‌رچووانی كۆلێجی پزیشكیی گشتی و خستنه‌ڕ‌ووی وه‌ڵامی وه‌زاره‌تی دارایی فیدراڵ له‌سه‌ر ئه‌م بابه‌ته‌ به‌ نووسراو یان ژماره‌ 1162 له‌ 9ی نیسانی 2025.

 PUKMEDIA