یەكەم لێدوانی رەسمی ئێران لەسەر بۆردومانكردنی لەلایەن ئەمریكاوە

ئاژانسەكان

ئاڵای ئەمریكا و ئێران

دۆناڵد ترەمپ، سەرۆكی ئەمریكا تەئكیدیكردەوە كە هێرشیان كردە سەر بنكەكانی فۆردۆ، نەتەنز و ئەسفەهان لە ئێران و دەڵێت: "فۆردۆ لەناوچوو، لە یەكەم كاردانەوەی دوای هێرشەكەش ئەمڕۆ وەزیری دەرەوەی ئێران ئیدانەی هێرشی ویلایەتەیەكگرتووەكانی ئەمریكای بۆ سەر دامەزراوە ئەتۆمییەكانی وڵاتەكەی كرد و دەڵێت: "ئەم كارە پێشێلكارییەكی مەترسیداری یاسا نێودەوڵەتییەكانە و لێكەوتەی هەمیشەیی دەبێت". 

بەرەبەیانی ئەمڕۆ  22ی6ی2025، دۆناڵد ترەمپ، سەرۆكی ئەمریكا لە پۆستێكدا لە  تۆڕی كۆمەڵایەتی ئێكس رایگەیاند، "ئێمە هێرشێكی زۆر سەركەوتوومان بۆ سەر سێ بنكە ئەتۆمییەكەی فۆردۆ، نەتەنز و ئەسفەهانی ئێران كرد و هاوكات دەڵێت: "هیچ سوپایەكی دیكە لە جیهاندا نییە كە بتوانێت ئەمە بكات، ئێستا كاتی ئاشتییە"، پێشتریش لە بەرنامەی Truth Social دوای بۆردومانەكانيش نوسی: "فۆردۆ تەواو بووە". 

هەر ئەمڕۆ دوای هێرشەكە عەباس عێراقچی  دەڵێت: "ئەمریكا، وەك ئەندامێكی هەمیشەیی لە ئەنجومەنی ئاسایشی نەتەوەیەكگرتووەكان، بە هێرشكردنە سەر دامەزراوە ئەتۆمییە ئاشتیخوازەكانی ئێران، پێشێلكارییەكی مەترسیداری پەیماننامەی نەتەوەیەكگرتووەكان، یاسای نێودەوڵەتی و پەیماننامەی بڵاونەكردنەوەی چەكی ئەتۆمیی ئەنجامداوە".
 
"رووداوەكانی ئەم بەیانییە جێگەی تووڕەیی و شەرمەزارییەكی گەورەن و لێكەوتەی هەمیشەییان دەبێت، پێویستە هەر یەكێك و هەموو ئەندامێكی نەتەوە یەكگرتووەكان هەست بە مەترسیی ئەم رەفتارە بكەن، عیراقچی وایوت.
 
عێراقچی ئاماژەی بە مافی وەڵامدانەوەی وڵاتەكەی كرد و  رایدەگەیەنێت: "بەپێی پەیماننامەی نەتەوەیەكگرتووەكان و ئەو بڕگانەی كە رێگە بە وەڵامدانەوەیەكی رەوا دەدەن لە چوارچێوەی بەرگری لە خۆكردندا، ئێران مافی هەموو بژاردەكان بۆ خۆی دەپارێزێت بۆ بەرگریكردن لە سەروەری و بەرژەوەندی و گەلەكەی."

دۆناڵد ترەمپ لەدوای هێرشەكە بەرەبەیانی ئەمڕۆ رایگەیاند: "بە فڕۆكەی جەنگی و مووشەكەوە هێرشیان كردووەتە سەر بنكەی ئەتۆمیی فۆردۆ، نەتەنز و ئەسفەهانی ئێران".
 
PUKMEDIA/ئاژانسەكان