عەباس کازم: هێرشەکانی سەر ئێران هەڕەشەی هەڵگیرسانی شەڕێکی هەرێمییە

واع

عەباس کازم عوبەید نوێنەری عیراق لە ئەنجومەنی ئاسایشی نەتەوە یەکگرتووەکان

نوێنەری عیراق لە ئەنجومەنی ئاسایشی نەتەوە یەکگرتووەکان رایدەگەیەنێت:" بەئامانجگرتنی دامەزراوە ئەتۆمییەکان رەنگە ببێتە هۆی دزەکردنی کارەساتبارانەی تیشکدانەوە لەناوچەکەدا".

عەباس کازم عوبەید نوێنەری عیراق لە وتارێکدا لەبەردەم ئەنجومەنی ئاسایشی نەتەوە یەکگرتووەکان، کە شەوی رابردوو سەبارەت بە پێشهاتەکانی ئێران کۆبووبونەوە، وتی:" ئەو پێشهاتانەی لە ناوچەکەدا روودەدەن، تاقیکردنەوەیەکی راستەقینەیە بۆ سیستمی نێودەوڵەتی، کە لەسەر بنەمای یاسا نێودەوڵەتییەکان و جاڕنامەی نەتەوە یەکگرتووەکان بنیادنراوە".

راشیگەیاند:"هێرشکردن بۆ سەر ئێران هەڕەشەی هەڵگیرسانی شەڕێکی هەرێمییە، کە گەلەکانی دەیان ساڵە ئازار دەچێژن".

عەباس کازم عوبەید ئاماژەی بەوەشکرد: "ئەو هەڵسوکەوتە تاکلایەنانەی کە ئەنجوومەنی ئاسایش تێدەپەڕێنن، شکۆی ئەو ڕێکخراوە نێودەوڵەتییە لاوازدەکات"، راشیگەیاند:"بەئامانجگرتنی دامەزراوە ئەتۆمییەکان رەنگە ببێتە هۆی دزەکردنی کارەساتبارانەی تیشکدانەوە، نەک تەنها بۆ ئەو وڵاتەی دامەزراوەی ئەتۆمی تیدایە، بەڵکو بۆ وڵاتانی ناوچەکە و دراوسێش، لەنێویاندا عیراق".

وتیشی: "ئێمە چەندین پێشێلکاریی ئاسمانیی دووبارەمان تۆمارکردووە، جارێکی دیکەش بەکارهێنانی ئاسمانی عیراق لە ململانێکاندا رەتدەکەینەوە".

PUKMEDIA