خولی بەكارهێنانەكانی ژیریی دەستكرد بۆ میدیاكارانی یەكێتی دەكرێتەوە

فۆتۆ.. حەمە عومەر

خولی بەكارهێنانەكانی ژیریی دەستكرد لە میدیادا

كەناڵی (المسری) و رۆژنامەی كوردستانی نوێ، خولێكی پڕاكتیكی بە ناونیشانی (بەكارهێنانەكانی ژیریی دەستكرد لە میدیادا) بۆ 25 رۆژنامەنووسی دەزگاكانی سەر بە بۆردی راگەیاندنی یەكێتی كردەوە و ماوەی دوو رۆژ بەردەوام بوو، بەڕێوەبەری دەزگای میدیایی (المسری)ش دەڵێت: "لە داهاتوودا بە شێوەیەكی بەرفراوانتر بەردەوام دەبین و تیشك دەخەینە سەر بوارە تایبەتمەندەكانی راگەیاندن".

سۆران عەلی بەڕێوەبەری دەزگای میدیایی (المسری)، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لە روانگەی بڕوابوونمان بە ژیریی دەسكرد لە بوارەكانی ژیان و بەتایبەت لە بواری میدیادا، كەناڵی (المسری) بەهاوبەشی لەگەڵ رۆژنامەی كوردستانی نوێ، رۆژانی 24-25ی6ی2025، لە ساڵۆنی كوردستانی نوێ، خولێكی رۆژنامەوانی پڕاكتیكیمان بە ناونیشانی (بەكارهێنانەكانی ژیریی دەستكرد لە میدیادا)، بۆ راگەیاندنكارانی كەناڵەكانی سەر بە بۆردی راگەیاندنی مەكتەبی راگەیاندن و هۆشیاری یەكێتیی نیشتمانیی كوردستان رێكخست و دوای تەواوبوونی خولەكەش بڕوانامەی دەرچوون و بەشداریكردنمان بەخشییە  بەشداربووان".

"خولەكە ماوەی دوو رۆژی خایاند و 25 رۆژنامەنووس بەشدارییان تێداكرد و بە شێوازە جۆربەجۆرەكانی ژیریی دەستكرد لە بواری راگەیاندندا ئاشناكران و بەشێوەی پڕاكتیكیش راهێنانیان پێكرا" سۆران عەلی وایوت.

راشیگەیاند: "ئەم جۆرە خولانە كاریگەری گەورەیان لەسەر بەرەوپێشبردنی توانای رۆژنامەنووسان دەبێت و ئاشنایان دەكات بە پەرەسەندن و پێشكەوتنە خێراكانی بواری ژیریی دەسكرد، كە بەردەوام لە پێشكەوتنێكی خێرا و گۆڕانكاریدایە".

بەڕێوەبەری دەزگای میدیایی (المسری) ئاماژەی بەوەشكرد: "تایبەتمەندی سەرەكی ئەم خولەش لە پراكتیزەكردنی ئەو زانیاریانەدا بوو كە بەشداربووانی پێئاشنا كران و تا باشترین ئاست سوودیان لێبینیوە، جگە لەوەی دوو دەزگای راگەیاندن بە هاوبەشی بەڕێوەیان بردووە".

ئەوەشی خستەڕوو: "وانەكانی خولەكە لەلایەن دوو كارمەندی كەناڵی (المسری) وە وتراونەتەوە بە ناوەكانی عوسمان ئەحمەد و عوسمان عەباس و بەپێی فیدباكەكانیش، بەشداربووان تا باشترین ئاست سوودیان لێبینیوە، لە داهاتووشدا بە پشتیوانی لێپرسراوی بۆردی راگەیاندنی یەكێتی، بەردەوام دەبین لە كردنەوەی ئەم جۆرە خولانە بە شێوەیەكی بەرفراوانتر بۆ سەرجەم كەناڵ و میدییاكارانی یەكێتی و  تیشك دەخەینە سەر بوارە تایبەتەكانی راگەیاندن، وەك ڤیدیۆ و مۆنتاژ و گرافیك ....".

PUKMEDIA