ترەمپ: هەفتەی داهاتوو ئەمریكا و ئێران كۆدەبنەوە

رۆیتەرز

دۆناڵد ترەمپ سەرۆكی ئەمریكا

دۆناڵد ترەمپ سەرۆكی ئەمریكا ئاشكرایدەكات، كە هەفتەی داهاتوو ئەمریكا لەگەڵ ئێرانییەكان كۆدەبێتەوە و دەڵێت: "ئەوەش دەریدەخات كە ئەگەری رێككەوتنی ئەتۆمی لەگەڵ تاران هەیە".

 ئەمڕۆ 25ی6ی2025 سەرۆكی ئەمریكا  لە كۆنگرەیەكی  رۆژنامەوانیدا رایگەیاند: "هەفتەی داهاتوو لەگەڵ ئێرانییەكان كۆدەبینەوە، رەنگە بگەینە رێككەوتن"، ئاماژەی بەوەشكردووە، كە پێیوانییە جارێكی دیكە  ئیسرائیل و ئێران هێرش بكەنەوە سەر یەكتر".

سەرۆكی ئەمریكا رەخنەی لە دەزگاكانی راگەیاندنی درۆینە لە ئەمریكا گرت كە ئەنجامی هێرشەكانیان لە ئێران دەخەنە ژێر پرسیارەوە و وتی: "لەكاتی هێرشەكەماندا 30 مووشەك لە ژێردەریاییەكانی ئەمریكاوە هەڵدران و بە وردی ئامانجەكانیان لە ئێران تێكشكاند".

ئاگربەستی نێوان ئێران و ئیسرائیل لە رۆژی چوار شەممە دوای شەڕێكی 12 رۆژە  پێینایە رۆژی دووەمەوە و تاران و تەلئەبیب هیچ هێرشێكیان نەكردووە، ئەمەش لە كاتێكدایە كە  هەوڵە نێودەوڵەتییەكان بە ئاڕاستەی گەڕانەوەیە بۆ دانوستانەكان و كۆتاییهینان بەململانێكان.

PUKMEDIA