160 هاوپەیمانی و حزب ناوی كاندیدەكانیان پێشكەشی كۆمسیۆن كردووە

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

كۆمسیۆنی عیراق رایدەگەیەنێت: "160 هاوپەیمانی و حزب و لیستی تاكەكەسی، لیستی ناوی كاندیدەكانیان بۆ بەشداریكردن لە هەڵبژاردنی ئەنجومەنی نوێنەران پێشكەش كردووە".

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عیراق رایگەیاند: "تا ئێستا  160 هاوپەیمانی و حزب و لیستی تاكەكەسی ناوی كاندیدەكانیان بۆ بەشداریكردن لە هەڵبژاردنی داهاتووی ئەنجومەنی نوێنەرانی عیراق، پێشكەش بە كۆمسیۆن كردووە".

راشیگەیاند: "كۆمسیۆن وردبینيی لە داتا و ئەولەویەت و بەڵگەنامەی كاندیدەكان دەستپێكردووە و پێویستی بە مانگێكە بۆ تەواوكردنی پڕۆسەكە".

یەكێتیی نیشتمانیی كوردستان بۆ بەشداریكردن لە هەڵبژاردنی ئەنجومەنی نوێنەرانی عیراق، ناوی سەرۆكی لیست و كاندیدەكانی پێشكەش بە كۆمسیۆنی باڵای سەربەخۆی هەڵبژاردنەكانی عیراق كردووە و نزیكەی 200 كاندیدی لەسەر ئاستی پارێزگاكانی هەولێر، سلێمانی، دهۆك، كەركوك، نەینەوا، دیالە، سەلاحەدین و بەغدا هەیە.

ئەمەش لە كاتێكدایە، ئەنجومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد.

PUKMEDIA