چوارەمین کۆنفرانسی دارایی بۆ گەشەپێدان بەبەشداری سەرۆککۆماری عیراق بەڕێوەدەچێت

نوسینگەی رۆژنامەوانی سەرۆک کۆمار

چوارەمین کۆنفرانسی نێودەوڵەتیی دارایی بۆ گەشەپێدان

چوارەمین کۆنفرانسى دارایی بۆ گەشەپێدان بەبەشداریى د.لەتیف رەشید سەرۆککۆماری عیراق و ژمارەیەک لە سەرۆکى وڵاتانى جیهان لە ئیسپانیا دەست بە کارەکانى دەکات و بڕیارە لەکۆنفرانسەکەدا سەرۆککۆمارى عیراق وتارێک پێشکەش بکات.

ئەمڕۆ 30ی6ی2025 کارەکانی یەکەم رۆژی کۆنفرانسە نێودەوڵەتییەکە دەستپێدەکات و تا 3ی7ی2025 دەخایەنێت، هاوکات بەپێى راگەیەندراوێکى سەرۆکایەتیى کۆمار سەرۆککۆمارى عیراق و خانمى یەکەم بەڕەسمی لەلایەن فلیپى شەشەم پاشاى ئیسپانیا و شاژنى ئەو وڵاتە پێشوازییان لێکراوە و سەرۆککۆمارى عیراق سوپاسى هەڵوێستى پاشاى ئیسپانیاى کردووە بۆ پێشوازى دۆزى گەلى فەڵەستین و کۆتاییهێنان بەشەڕ لەو وڵاتە و  تەئکیدی لە پێشخستنى پەیوەندییەکانى هەردوو وڵات کردووەتەوە، کە لە خزمەت گەلى عیراق و ئیسپانیا دابێت.

هەر لەڕاگەیەنراوەکەدا ئاماژە بەوەشکراوە، ئەمە یەکەمین بۆنەی هاوشێوەیە لەساڵی 2003 وە کە تێیدا پێشوازی رەسمی لە سەرۆک کۆماری عیراق و خانمی یەکەم  لەلایەن پادشا و شاژنی ئیسپانیاوە دەکرێت و دەبێتە هەنگاوێکی پێشکەوتوو لەپەرەپێدانی پەیوەندییە دیبلۆماتییەکانی نێوان هەردوو وڵات. 


چوارەمین کۆنفرانسی نێودەوڵەتیی دارایی بۆ گەشەپێدان (FFD4)

ماڵپەڕی نەتەوەیەکگرتووەکان بڵاویکردەوە، کە چوارەمین کۆنفرانسی نێودەوڵەتیی دارایی بۆ گەشەپێدان (FFD4) لە 30ی حوزەیران تاوەکە 3ـی تەمموزی 2025  لە ناوەندی پێشانگە و کۆنفرانسی  لەFIBES  لە شاری سێڤییای ئیسپانیا بەڕێوەدەچێت.

" ئەم کۆنفرانسە دەرفەتێکی ناوازە بۆ چاکسازی لە بواری دارایی لە هەموو ئاستەکاندا دەڕەخسێنێت، لەوانەش پشتگیریکردن لە چاکسازی لە هەیکەلی دارایی نێودەوڵەتی و چارەسەرکردنی ئەو ئاڵنگارییانە، کە رێگری لە سەرمایەگوزاریی خێرا لە بواری وەبەرهێناندا دەکەن و ئەوەش بۆ هێنانەدیی ئامانجی گەشەپێدانی بەردەوام"، ماڵپەڕی نەتەوە یەکگرتووەکان بڵاویکردووەتەوە.

هەروەها رێکخراوی کاروباری ئابووری و کۆمەڵایەتیی نەتەوەیەکگرتووەکان  (DESA)، لە رێگەی نووسینگەی دارایی بۆ گەشەپێدانی بەردەوام و ئەنجوومەنی ئابووری و کۆمەڵایەتیی نەتەوە یەکگرتووەکان (ECOSOC) پشتگیری کۆنفرانسەکە و پرۆسەی ئامادەکارییەکەی دەکەن.

کۆنفرانسەکە لە ئاستێکی باڵای  سیاسیدا بەڕێوەدەچێت، لەوانە سەرۆکی دەوڵەت و حکومەت، وەزیرە پەیوەندیدارەکان – وەزیرانی دارایی، کاروباری دەرەوە و هاوکاری پەرەپێدان  و نوێنەرانی تایبەتی دیکە بەشداری تێدا دەکەن.


PUKMEDIA