سەرۆكی نوێی دادگای فیدراڵی یەكەم كۆبوونەوەی لەگەڵ ئەندامەكانی ئەنجامدا

پەڕەی رەسمی دادگای فیدراڵی

یەكەم كۆبوونەوەی دادگای فیدراڵی بە سەرۆكایەتی نوێ

ئەمڕ‌ۆ 7ی تەمموزی 2025، دادگای باڵای فیدراڵی لە سەردەمی سەرۆكایەتی نوێدا و بەئامادەبوونی سەرجەم ئەندامەكانی، یەكەمین كۆبوونەوەی راوێژكاری خۆی بۆ تاوتوێكردنی بەرەوپێشچوونی كارەكانی دادگاكە ئەنجامدا.

لە كۆبوونەوەكەدا، دادگای باڵای فیدراڵی عیراق جەختی لەم خاڵانە كردەوە:

یەكەم:  پابەندبوونی دادگای باڵای فیدراڵی بە دەسەڵاتە دەستورییەكانی خۆی، بەپێی ئەوەی لە ماددەكانی (52 و93) ی دەستووری عیراقدا دیاریكردووە، هەروەها ماددەی 4 لە لەیاسای دادگای فیدراڵی ژمارە 30 ساڵی 2005 ی هەموواركراو، بە یاسای ژمارە 25ی ساڵی 2021، هەروەها پابەندبوون بە سەربەخۆیی دادگا لە بڕیاردان و رێگەنەدان بەدەستێوەردانی سیاسی لە كاروباری دادگا.

دووەم: پابەندبوونی دادگای باڵای فیدراڵی بە چەمكێكی بێلایەنی و نێوەندگیری لەنێوان لایەنە سیاسییە ناكۆكەكاندا، هەروەها جەختكردنەوە لەوەی ئامانجی بنەڕەتی دادگای باڵا بریتییە لە پارێزگاریكردنی لە سیستمی سیاسی عیراق و رێزگرتن لە مافە دەستوورییەكانی سەرجەم پێكهاتەكان.

سێیەم: دەستوەرنەدان لە كاروباری دەسەڵاتەكانی یاسادانان و جێبەجێكردن و رێزگرتن لەهەر بڕیارێك كە ئەو دوو دەسەڵاتانە لە چوارچێوەی تایبەتمەندییە دەستوورییەكانی خۆیاندا دەریدەكەن، جگە لەو بڕیارانەی پێشێلی دەقەكانی دەستووری تێیدا كراوە كە پێویستە بەرپەرچبدرێنەوە لە رێگەی تۆماركردنی سكاڵای دەستووری سەبارەت بەو پێشێلكارییە، هەروەها دادگای باڵا چەمكی جیاكردنەوی دەسەڵاتەكان جێبەجێ دەكات.

چوارەم: جەختكردنەوە لەوەی دادگای باڵای فیدراڵی لە پرسی هەڵبژاردنە گشتییەكاندا رۆڵی بریتییە لەوەی (ماددەی 93/ حەوتەم)ی دەستوور بۆی دیاریكردووە و بەهیچ جۆرێك دەستێوەردان لە ململانێ سیاسیییەكاندا ناكات.

پێنجەم: جەختكردنەوەی لەوەی دادگای باڵای فیدراڵی كە یەكێك لەپێكهاتەكانی دەسەڵاتی دادوەرییە، بەپێی حوكمەكانی ماددەی 89 لە دەستووری هەمیشەیی عیراق، بۆیە بە هەماهەنگی لەگەڵ ئەنجومەنی دادوەری و پێكهاتەكانی دیكەی دەسەڵاتی داوەری كار بۆ پتەوكردنی چەمكی دادپەروەری و رێزگرتن لە حوكمەكانی دەستوور و یاساكان دەكات.

شەشەم: هەماهەنگیكردن لەگەڵ لایەنە تایبەتمەندەكان بۆ سازكردنی مێزگرد و دیبەیت و كۆنفرانس و دیداری راوێژكاری لەگەڵ شارەزایان و مامۆستایانی یاسای دەستووری بەو شێوەیەی لەخزمەت پێشخستنی كاروباری دادگای دەستووریدا بێت.

PUKMEDIA