کۆمسیۆن: 7هەزار و 926 کاندید هەوڵی بەدەستهێنانی 329 کورسی دەدەن

ئەرشیف

لیستی لایەن و کاندیدەکان

کۆمسیۆنی باڵای سەربەخۆی هەڵبژاردنەکانی عیراق ئاشکرای کرد:" 7هەزار و 926 کەس وەک کاندید ناوی خۆیان بۆ هەڵبژاردنی ئەنجومەنی نوێنەران تۆمار کردووە و  زۆرترینی لە بەغدایە و کەمترینیشی لە دهۆکە".

کۆمسیۆنی باڵای سەربەخۆی هەڵبژاردنەکان، لە ئامارێکیدا ژمارەی کاندید و لایەن و هاوپەیمانییەکانی بڵاوکردەوە و بەپێی ئامارەکە:" لە تەواوی عیراق 7هەزار و 926 کەس وەک کاندید ناوی خۆیان تۆمار کردووە، لەو ژمارەیەش پێنج هەزار و701 کەسیان لە رەگەزی نێرن و دوو هەزار و225 کاندیدیش لە رەگەزی مێن".

کۆمسیۆن ئەوەشی ئاشکرا کردووە:" زۆرترین ژمارەی کاندید لە بەغدایە بە دوو هەزار و 353 کاندید و لە دهۆکیش کەمترینە و 61 کەس خۆیان کاندید کردووە".

بە پێی ئامارەکەی کۆمسیۆن، لە هەرێمی کوردستان هیچ هاوپەیمانێتییەک تۆمار نەکراوە و 19 کەسیش وەک کاندیدی سەربەخۆ خۆیان تۆمار کردووە".

بەپێی رێکارەکانی کۆمسیۆن:" دوای تۆمارکردن، ناوی کاندیدەکان بۆ لایەنی پەیوەندیدار دەنێردرێت، بەمەبەستی دڵنیابوونەوە لە شیابوونیان بۆ پەرلەمان، کە بریتین لە وەزارەتەکانی بەرگری و ناوخۆ و خوێندنی باڵا و پەروەردە و دەستەی دەستپاکی و ئەنجومەنی دادوەری،ئەمە جگە لەوەی بۆ لایەنی پەیوەندیداری هەرێمی کوردستانیش دەنێردرێن و پێویستە لە ماوەی 15 رۆژدا وەڵام بدرێنەوە".

 بڕیارە لە 11ی11ی2025، هەڵبژاردنی ئەنجومەنی نوێنەرانی عیراق بەڕێوەبچێت، کە تێیدا21 ملیۆن و 400 هەزار و 89 دەنگدەر 329 کاندید لە کۆی 7هەزار و 926 کاندید بۆ خولی داهاتووی ئەنجومەنی نوێنەران هەڵدەبژێرن".

PUKMEDIA