فراکسیۆنە کوردستانییەکان جگە لەپارتی داوادەکەن کێشەی مووچە بخرێتە کارنامەی پەرلەمانەوە

راگەیاندنى ئەنجوومەنى نوێنەرانى عیراق

ئەنجوومەنى نوێنەرانى عیراق

ئه‌مڕ‌ۆ له‌ دانیشتنی ئه‌نجوومه‌نی نوێنه‌رانی عیراق فراكسیۆنه‌ كوردستانییه‌كان جگه‌ له‌ پارتی دیموكراتی كوردستان ئیمزایان كۆكرده‌وه‌، بۆ ئه‌وه‌ی دانیشتنێكی تایبه‌ت به‌ پرسی مووچه‌ ئه‌نجامبدرێت.

سروه‌ محه‌مه‌د ئه‌ندامی ئه‌نجوومه‌نی نوێنه‌رانی عیراق له‌ فراكسیۆنی یه‌كێتی، به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "سه‌رجه‌م فراكسیۆنه‌ كوردستانییه‌كان جگه‌ له‌ پارتی دیموكراتی كوردستان له‌ ئه‌نجومه‌نی نوێنه‌ران ئیمزایان كۆكردووه‌ته‌وه‌ بۆ زیاد كردنی بڕ‌گه‌یه‌ك تایبه‌ت به‌ دابینكردنی موچه‌ی فه‌رمانبه‌رانی هه‌رێمی كوردستان".

"ئێمه‌ وه‌ك فراكسیۆنی یه‌كێتی له‌ناو دانیشتنی ئه‌نجوومه‌نی نوێنه‌ران به‌شداربوون و له‌گه‌ڵ ئه‌وه‌شدا، زیاتر له‌ 72 ئیمزامان كۆكرده‌وه‌، بۆ دانیشتنێكی تایبه‌تی ئه‌نجوومه‌نی نوێنه‌رانی عیراق سه‌باره‌ت به‌ مووچه‌ی مووچه‌خۆرانی هه‌رێم"، سروه‌ محه‌مه‌د وا ده‌ڵێت.

ئه‌وه‌شی خسته‌ڕ‌وو:"له‌كۆبوونه‌وه‌ی ئه‌نجومه‌نی نوێنه‌راندا سه‌رۆكی فراكسیۆنی یه‌كێتیی نیشتمانیی كوردستان بارودۆخی مووچه‌خۆرانی هه‌رێمی باس كرد، كه‌ ماوه‌ی دوو مانگه‌ مووچه‌یان وه‌رنه‌گرتووه‌ و پێویسته‌ په‌رله‌مان دانیشتنێك له‌سه‌ر ئه‌و پرسه‌ رێكبخات". 

سروه‌ محه‌مه‌د ئه‌ندامی ئه‌نجوومه‌نی نوێنه‌رانی عیراق روونیكرده‌وه‌: "بۆ ئه‌وه‌ی فشاره‌كان بۆ له‌ نێوان هه‌ردوو حكومه‌ت زۆرتربن بۆ رێككه‌وتن، ئێمه‌ ئه‌مڕ‌ۆ به‌ كۆكردنه‌وه‌ی ئه‌م ئیمزایانه‌ له‌ئه‌نجوومه‌نی نوێنه‌رانیشه‌وه‌ هه‌وڵده‌ده‌ین، چونكه‌ ماوه‌یه‌كی زۆره‌ گفتوگۆكان به‌رده‌وامن، به‌ڵام ناگه‌نه‌ هیچ رێككه‌وتنێك".

ئه‌مڕ‌ۆ 12ی7ی2025 پشووی وه‌رزی یاسادانانی ئه‌نجومه‌نی نوینه‌رانی عیراق كۆتایی هات و دانیشتنی ژماره‌ 1 ده‌ستیپێكرد و له‌كارنامه‌كه‌دا 7 پڕۆژه‌یاسا بۆ دانگدان و خوێندنه‌وه‌ ئاماده‌كرابوون.


PUKMEDIA