هەرێمی کوردستان بەبارودۆخێکی دژواردا تێدەپەڕێت

ئەرشیف

ئاڵای کوردستان

كوردستانی نوێ زنجیرەیەك سەروتار كە حەوت بەشە بەناونیشانی (زاخاوی خەباتی نیشتمانی بڵاودەكاتەوە) و لە زنجیرەی سێهەمیدا، كە ئەمڕۆ 15ی7 بڵاوكراوەتەوە، باس لە نەبوونی یەکدەنگی و یەکهەڵوێستی و یەکدەستی دەکات و ئاماژەبەوەدەکات، ئەم دەردە کوشندەیە زۆر لەمێژە لە بەرهەمی شاعیران و ئەدیبانیشماندا رەنگیداوەتەوە، بەجۆرێک دەیان نووسەر و شاعیر بە هەزاران دێڕیان لەسەر پێویستیی یەکدەنگیی گەلەکەمان نووسیوە و هەموو نەهامەتییەکانیشیان هەر بۆ ئەو دەردە گێڕاوەتەوە.


لەسەروتارەكەدا هاتووە: " مێژووی گەلەکەمان پڕە لە نموونەی زیانەکانی ناتەبایی و دووبەرەکی و بێگومان بە زیانی گەورەش بۆ خەباتی گەلەکەمان گەڕاوەتەوە، بەتایبەتیش چونکە هەموو ئەو وێستگانە لەلایەن گروپ و تاقمە سیاسییەکانەوە، جگە لە کێبڕکێی حزبایەتی و جیاوازیی بەرنامە و بۆچوون، دوژمنایەتیی یەکتریشی بەخۆوە بینیووە، ئیتر نەیار و رکابەر و دوژمنەکانمان سوودیان لێ وەرگرتووە و بۆ لاوازکردنی شۆڕش لەکاتی شۆڕش و هەروەها بۆ لێدانی ئەزموونی حوکمڕانیی ئێستامان. ".

 هەروەك لە سەروتارەكەدا ئاماژە بەوەشدراوە،"ئاساییە حزب و بزووتنەوە سیاسییەکان بەرنامە و دیدگایان بۆ چارەسەری گرفت و مەسەلەکان جیاوازبێ و هەریەکەیان بە شێوازی جیاواز خەباتی خۆیان رانێن، بەڵام ناکرێت لە مەسەلە چارەنووسسازە نەتەوەیی و نیشتمانییەکاندا، بە ئاراستەی جیاواز بئاژوون و دژبن. وەک چۆن لە مێژووماندا زەرەری دووبەرەکی و لێکترازانمان دیوە، ئاوهاش قازانجی یەکدەنگی و یەکهەڵوێستیشمان لەبەرچاوە و باشترین نموونەش دروستکردنی بەرەی کوردستانی بوو لە ناوەڕاستی هەشتاکانی سەدەی رابردوودا و هەمووشمان بینیمان چۆن گەلەکەمان بەری ئەو یەکدەنگی و یەکهەڵوێستییەی لە راپەڕین و دواتریش لە هەڵبژاردنی پەرلەمان و پێکهێنانی حکومەتی هەرێمدا چنییەوە".

وەك راگەیاندنی یەكێتیی نیشتمانیی كوردستان، لە زنجیرەیەكدا، سەروتاری كوردستانی نوێ بۆ ئەم مەبەستە تەرخان دەكرێت و رووندەکرێتەوە:" ئێستا هەرێمی کوردستان بە بارودۆخێکی دژواردا تێدەپەڕێت، کێشەی نەناردنی بودجە کە بەشێکی گرنگی مووچەی فەرمانبەر و خانەنشینانە، بۆتە گرفتێکی گەورە و بەرۆکی خەڵکی هەرێم و حکومەتیشی گرتووە".

دەقی زنجیرەی سێهەمی سەروتارەكە لە بەشی بیروڕای PUKMEDIA دا بڵاوكراوەتەوە.

PUKMEDIA