یەکێتی و پارتی ئەرکیانە حکومەت پێکبهێنن

PUKMEDIA

لۆگۆی یەکێتی و پارتی

كوردستانی نوێ زنجیرەیەك سەروتار كە حەوت بەشە بەناونیشانی (زاخاوی خەباتی نیشتمانی بڵاودەكاتەوە) و لە زنجیرەی حەوتەم و کۆتاییدا، كە ئەمڕۆ 21ی7 بڵاوكراوەتەوە، باس لە حكومەتێكی خزمەتگوزار و پەرلەمانێكی كارا دەکات و دەنووسێت: " ئاماژەكان لە هاوكێشەی سیاسی و ئەگەری گۆڕانكارییەكانی ناوچەكەدا، هێشتا بەتەواوی بۆ هەمووان روون نین، بەڵام جموجوڵێكی هەرێمی و نێودەوڵەتیی بەدیدەكرێت، كە جارێ دیارنییە بە چ ئاڕاستەیەكە و لە كۆتاییدا تا چەند لە بەرژەوەندیی گەلانیی مافخوراوی خۆرهەڵاتی ناوەڕاست و بەتایبەتیش گەلی كورد، دەبێت".

لەسەروتارەكەدا هاتووە: "".لەم قۆناغەی ئێستادا، ئەوەی دەبینرێت و هەستی پێدەكرێت، لە چوارچێوەی ئەو جموجۆڵە سیاسی و سەربازییانەی لە ناوچەكەدا هەن، گوشارێك بۆ سەر گەلی كورد، لە باشوری كوردستان و لە رۆژئاڤاش، دروستبووە وەك بڵێی ویستێك هەبێت ئیتر بە زۆر ئەستێرەی بەختی كورد بەرەو كزیی ببرێت".
هەروەك لە سەروتارەكەدا ئاماژە پەرلەمانی کوردستان و پێکهێنانی حکومەت دەکات و دەڵێت: "هەرێمی كوردستان و خەڵكەكەی، حكومەتەكەی، دامەزراوەكان و دەستكەوتەكانی كە بە خوێنی شەهیدان بەدەستهاتوون، لەنێو ئەو گێژاوە سیاسی و سەربازیی و دیموگرافییەدا، لە مەترسییەكی گەورەدان، لە ناو خۆشماندا، پەرلەمان نزیكەی هەشت مانگە هەڵبژێردراوە و هێشتا ناكارایە، حكومەت پێكنەهێنراوە، نادادپەروەریی و كەموكوڕیی ئیداری و گەندەڵی لە بەشێكی سێكتەرەكاندا تەشەنەی سەندووە و خەریكە دەبێتە دیاردەیەك".

ئەوەشخراوەتەڕوو: "لەم دۆخە دژوارەدا، لایەنە سیاسییەكانی كوردستان، بەتایبەتی یەكێتی و پارتی ئەركیانە هەرچی زووە بە پێكهێنانی حكومەتێكی پتەو و خزمەتگوزار و شەفاف و هەروەها بووژاندنەوەی پەرلەمان، بەدانانی كەسی شیاو و شارەزاو لێهاتوو لە پۆست و جومگەكانی حكومەت و پەرلەماندا چ لە كوردستان یان لە بەغدا، بە رێكخستنەوەی داهاتی ناوخۆ و نەوت و خاڵە سنورییەكان و رێگریی لە گەندەڵی و دیاردە دزێوەكانی تری سێكتەرەكان، بەهانای گەلەكەی خۆیانەوە بێن و لەم دۆخە دژوارەی ئێستادا رزگاری بكات."

دەقی زنجیرەی حەوتەمی سەروتارەكە لە بەشی بیروڕای PUKMEDIA دا بڵاوكراوەتەوە.

PUKMEDIA