دادگای فیدراڵی له‌سه‌ر سێ سكاڵای تایبه‌ت به‌ هه‌رێم كۆده‌بێته‌وه‌

PUKMEDIA

دادگای باڵای فیدراڵی عیراق

بڕیارە رۆژی دووشه‌ممه‌ی داهاتوو  28ی7ی2025، دادگای باڵای فیدراڵیی عیراق، له‌سه‌ر سێ سكاڵای تایبه‌ت به‌ هه‌رێمی كوردستان كۆببێته‌وه‌ .

به‌پێی خشته‌ی دادبینیی دادگاكه‌، رۆژی 28ـی ئه‌م مانگه‌ دادگای باڵای فیدراڵی له‌سه‌ر پێنج سكاڵا كۆده‌بێته‌وه‌، كه‌ سێ له‌و سكاڵایانه‌ تایبه‌تن به‌ هه‌رێمی كوردستان و له‌سه‌ر پرسه‌كانی مووچه‌ و ده‌ركردنی فه‌رمانسالاری تایبه‌ت به‌ مووچه‌ و پرۆژه‌ی رووناكیی تایبه‌ت به‌ كاره‌بای هه‌رێمی كوردستانه‌ .

سكاڵای یه‌كه‌م له‌لایه‌ن سێ هاووڵاتی  مووچه‌خۆره‌وه‌ دژی سه‌رۆكوه‌زیران و وه‌زیری دارایی عیراق تۆماركراوه‌ و داواده‌كه‌ن، مووچه‌ی فه‌رمانبه‌رانی هه‌رێمی كوردستان له‌ ناكۆكییه‌ سیاسییه‌كان و خه‌رجیی كرداری دووربخرێته‌وه‌ .

هاوكات سكاڵای دووه‌م له‌لایه‌ن دوو هاووڵاتییه‌وه‌ دژی وه‌زیری دارایی عیراق تۆماركراوه‌ و داوای گره‌نتیكردنی خه‌رجكردنی مووچه‌ی فه‌رمانبه‌رانی هه‌رێمی كوردستان ده‌كه‌ن، به‌شێوه‌یه‌كی مانگانه‌ له‌واده‌ی دیاریكراوی خۆیدا دوور له‌ ناكۆكییه‌كانی نێوان به‌غدا و هه‌ولێر، هه‌روه‌ها داوای ده‌ركردنی فه‌رمانێكی سالاری ده‌كه‌ن بۆ خه‌رجكردنی مووچه‌ به‌بێ دواكه‌وتن.

سكاڵای سێیه‌م دژی سه‌رۆك و سه‌رۆكوه‌زیرانی هه‌رێمی كوردستان تۆماركراوه‌، بۆ ره‌تكردنه‌وه‌ی پرۆژه‌ی رووناكی و دابینكردنی كاره‌بای 24 سه‌عاتی له‌هه‌رێم.

هه‌روه‌ها دوو سكاڵاكه‌ی دیكه‌ تایبه‌تن به‌ یاسای باری كه‌سیی عیراق و دامه‌زراندنی یاریده‌ده‌رانی سه‌رۆكی زانكۆكان.

PUKMEDIA