دادگای فیدراڵی سێ سكاڵای تایبەت بە هەرێم رەتدەكاتەوە

PUKMEDIA

دادگای باڵای فیدراڵیی عیراق

ئەمڕۆ دووشەممەی 28ی7ی2025، دادگای باڵای فیدراڵیی عیراق، هەرسێ سكاڵاكەی تایبەت بە هەرێمی كوردستانی رەتكردەوە و رایگەیاند: "سكاڵاكانمان رەتكردەوە، چونكە لە تایبەتمەندی دادگاكەماندا نییە".

سێ سكاڵاكە تایبەت بوون بە هەرێمی كوردستان و لەسەر پرسەكانی مووچە و دەركردنی فەرمانسالاری تایبەت بە مووچە و پڕۆژەی رووناكیی تایبەت بە كارەبای هەرێمی كوردستان بوو، دادگاكە سەرجەمیانی رەتكردەوە و رایگەیاند: "ئەو سكاڵایانە لە تایبەتمەندی دادگای فیدراڵیدا نین".

سكاڵای یەكەم لەلایەن سێ هاووڵاتی مووچەخۆرەوە دژی سەرۆكوەزیران و وەزیری دارایی عیراق تۆماركرا و داوایان كرد، مووچەی فەرمانبەرانی هەرێمی كوردستان لە ناكۆكییە سیاسییەكان و خەرجیی كرداری دووربخرێتەوە، سكاڵای دووەمیش لەلایەن دوو هاووڵاتییەوە دژی وەزیری دارایی عیراق تۆماركرا و داوای گرەنتیكردنی خەرجكردنی مووچەی فەرمانبەرانی هەرێمی كوردستانیان كرد، بەشێوەیەكی مانگانە لەوادەی دیاریكراوی خۆیدا دوور لە ناكۆكییەكانی نێوان بەغدا و هەولێر، هەروەها داوای دەركردنی فەرمانێكی سالاری-یان بۆ خەرجكردنی مووچە بەبێ دواكەوتن كرد.

سكاڵای سێیەم دژی سەرۆك و سەرۆكوەزیرانی هەرێمی كوردستان تۆماركرا بوو بۆ رەتكردنەوەی پڕۆژەی رووناكی و دابینكردنی كارەبای 24 سەعاتی لەهەرێم.

PUKMEDIA