ترەمپ وەڵامی سەرۆکی پێشووی رووسیا دەداتەوە

Sputnik/Reuters

ترەمپ و مێدڤێدێڤ

ترەمپ وەڵامی سەرۆکی پێشووی رووسیا دەداتەوە و رایدەگەیەنێت:" فەرمانم کردووە دوو ژێردەریایی ئەتۆمی لە ناوچە گونجاوەکاندا جێگیر بکرێن، ئەگەر لێدوانە هەڕەشە ئامێزەکانت بەردەوام بن".

دۆناڵد ترەمپ سەرۆکی ئەمریکا، لەچاوپێکەوتنێکیدا لەگەڵ رۆژنامەی گاردیان رایگەیاند:" فەرمانم کردووە دوو ژێردەریایی ئەتۆمی لە ناوچە گونجاوەکاندا جێگیر بکرێن، ئەگەر لێدوانە هەڕەشە ئامێزەکانی دیمیتری مێدڤێدێڤ سەرۆکی پێشووی رووسیا بەردەوام بن، وشەکان زۆر گرنگن و زۆرجار دەتوانن ببنە هۆی دەرئەنجامی چاوەڕواننەکراو، هیوادارم ئەمە یەکێک لەو حاڵەتانە نەبێت".
راشیگەیاند:" هەڕەشەیەک لەلایەن سەرۆکێکی پێشووی رووسیاوە کراوە و ئێمەش گەلەکەمان دەپارێزین".

پێشتر دیمیتری مێدڤێدێڤ سەرۆکی پێشووی رووسیا تویتێکی هەڕەشەئامێزی کرد و رایگەیاند:" لەگەڵ زیادبوونی گرژییەکان لەسەر جەنگی ئۆکرانیا ئامادەین هێرشی ئەتۆمی ئەنجام بدەین، لەبەرامبەریشدا دۆناڵد ترەمپ سەرۆکی ئەمریکا لە پۆستێکدا لە تروس سۆشیاڵ وتی:" بڕیارم داوە شوێنی ژێردەریاییە ئەتۆمییەکان بگۆڕم بەهۆی لێدوانە زۆر ورووژێنەرەکانی مێدڤێدێڤ-ەوە.

هاوکات لەچەند رۆژی رابردوودا، ترەمپ ماوەی راگەیاندنی ئاشتی لەگەڵ ئۆکرانیا بۆ رووسیا  کەمکردەوە لە 50 رۆژەوە بۆ 10 رۆژ و رایگەیاند:" ئامادەم گەمارۆ و سزای دارایی دیکە بەسەر رووسیادا بسەپێنێنم.

ئەمەش لەکاتێکدایە، هەفتەی رابردوو گەڕی سێیەمی دانوستانە راستەوخۆکانی نێوان رووسیا و ئۆکرانیا لە ئەستەنبوڵ بەڕێوەچوو، بەڵام لە کەمتر لە سەعاتێکدا کۆتاییهات و تا ئێستا جگە لە ئاڵوگۆڕی دیلەکان هیچ رێککەوتنێکی دیکە نەکراوە.

PUKMEDIA / رۆژنامەی گاردیان