قوباد تاڵەبانی: داكۆكیكردن لە ئێزدییەكان ئەركمانە

راگەیاندنی قوباد تاڵەبانی

مۆنیومێنتی ئێزدییەكان

لە یادی 11 ساڵەی جینۆسایدی ئێزدییەكاندا، قوباد تاڵەبانی، جێگری سەرۆكی حكومەتی هەرێمی كوردستان، پەیامێكی بڵاوكردووەتەوە و رایگەیاندووە: "لە مێژوودا ئێزدییەكان دەیان جار كەوتوونەتەبەر شاڵاوی رەشەكوژی و جینۆساید، بۆ ئەوەی جارێكیتر روبەڕووی هیچ جۆرە ستەم و نادادییەكی تر نەبنەوە، ئەركی ئەخلاقی و نیشتمانیی پێكهاتەكانی كوردستانە بە هەموو تواناوە پشتوپەنایان بین و داكۆكیكاری سەرسەختی مافەكانیان بین".

دەقی پەیامەكە:

 لە یازدەیەمین ساڵیادی كۆمەڵكوژیی خوشك و برایانی ئێزدیماندا، یادی هەموو قوربانییانی ئەو تاوانە گەورە و لەبیرنەكراوە بەرز رادەگرین و سڵاو دەنێرین بۆ كەسوكاری سەربەرزیان.

لە مێژووی دوور و نزیكدا ئێزدییەكان دەیان جار كەوتوونەتەبەر شاڵاوی رەشەكوژی و جینۆسایدەوە، كە دوایین جار بە بەرچاوی هەموو جیهانەوە لەلایەن تیرۆریستانی داعشەوە هەوڵی سڕینەوە و لەناوبردنیان درا.

بۆ ئەوەی جارێكیتر روبەڕووی هیچ جۆرە ستەم و نادادییەكی تر نەبنەوە، ئەركی ئەخلاقی و نیشتمانیی تەواوی پێكهاتەكانی گەلی كوردستانە لەمەودوا بە هەموو تواناوە پشتوپەنایان بین و داكۆكیكاری سەرسەختی مافەكانیان بین.

PUKMEDIA