نوسینگەی خانمی یەكەم شوێنی وەرگرتنی وتەی شاهیدانی تاوانەكانی عەجاج دیاریدەكات

PUKMEDIA

عه‌جاج ئه‌حمه‌د حه‌ردان

 نوسینگەی خانمی یەكەم، داوا لە هەموو ئەو كەسانە دەكات كە شاهیدی تاوانەكانی تۆمەتبار عەجاج ئەحمەد حەردان-ن،  لە رۆژانی  دووشەممە رێكەوتی 4ی 8ی 2025 ، تا 9ی 8ی 2025، سەردانی مۆزەخانەی نیشتمانی ئەمنەسورەكە لە سلێمانی، بەڕێوەبەرایەتی گشتی شەهیدانی گەرمیان لە كەلار، مۆنۆمێنتی ئەنفال لە چەمچەماڵ بكەن و بەڵگەنامەی یاسایی پێویست لەگەڵ خۆیاندا ببەن، چونكە لەڕێگەی تیمێكی تایبەتەوە كاری كۆكردنەوەی بەڵگەكان و وەرگرتنی وتەی شاهیدەكان بە ئەنجام دەگەیەنێت بە مەبەستی ئامادەكردنیان بۆ دادگا.
‌
نوسینگەی خانمی یەكەمی عیراق، لە روونكردنەوەیەكدا سەبارەت بە دۆسیەی تۆمەتبار عەجاج ئەحمەد حەردان، رایگەیاندووە: "دوابەدوای هەوڵەكانی خانمی یەكەمی عیراق بۆ دەستگیركردنی عەجاج ئەحمەد حەردان، تۆمەتباری سەرەكی گرتوخانەی نوگرە سەلمان، كە رۆڵێكی زۆر دڕندانە و بكوژانەی هەبووە لەگەڵ ئەنفالكراوەكانی گرتووخانەكە و كەسو كارەكانیاندا، پاش دادگاییكردن و سزادانی عەلی حەسەن مەجید و پێنج گەوره بەرپرسی دیكەی تاوانی ئەنفال لەلایەن دادگای باڵای تاوانەكانی عیراق لە ساڵی 2006 و 2007، دۆسیەیەكی سەربەخۆ بۆ چەندین تۆمەتباری تاوانی ئەنفال كرایەوە كە عەجاج یەكێك بوو لەو داواكراوانە".

ئەوەشخراوەتەڕوو: "لە ئێستادا و لەم قۆناغەدا پێویستە سكاڵا و وتەی هەموو ئەو كەسانەی كە شاهیدی كارەكانی ئەم تۆمەتبارەن تۆمار بكرێن، وەك ئەركێكی نیشتمانی و بە مەبەستی كەمكردنەوەی  بارگرانی سەر شانی سكاڵاكارانی دۆسیەی ناوبراو لەڕێگەی تیمێكی تایبەتەوە كاری كۆكردنەوەی بەڵگەكان و وەرگرتنی وتەی شاهیدەكان بە ئەنجام دەگەیەنرێت بە مەبەستی ئامادەكردنیان بۆ دادگا و تەواوكردنی رێكارە یاساییەكان".

‌‎نوسینگەی خانمی یەكەم لە روونكردنەوەكەدا داوا لە هەموو ئەو كەسانە دەكات كە شاهیدی كارەكانی ئەم تۆمەتبارەن، لە ‎سەعات  9 ی سەرلەبەیانی تا 12 ی نیوەڕۆی رۆژانی  دووشەممە رێكەوتی 4ی 8ی 2025 ، تا رۆژی شەممە رێكەوتی 9ی 8ی 2025.سەردانی ئەو ناونیشانانەی لای خوارەوە بكەن و بەڵگەنامەی یاسایی پێویست لەگەڵ خۆیاندا ببەن.

‌‎ناونیشانەكان:

‌‎-سلێمانی (مۆزەخانەی نیشتمانی ئەمنەسورەكە)
‌‎-كەلار (بەڕێوەبەرایەتی گشتی شەهیدانی گەرمیان)
‏-‎چەمچەماڵ (مۆنۆمێنتی ئەنفال)

ئەمەش لەكاتێكدایە، رۆژی 31ی 7ی 2025، نوسینگەی خانمی یەكەمی عیراق، دەستگیركردنی تاوانبارێكی شاڵاوەكانی ئەنفال بە ناوی "عەجاج ئەحمەد حەردان" راگەیاند و داواشی لە زیندانیكراوان و كەسوكاری زیندانیكراوان و بێسەرشوێنبووەكان كرد، بۆ تۆماركردنی سكاڵا دژی ئەو تاوانبارە پەیوەندیان پێوەبكەن.

PUKMEDIA