کۆمسیۆن وادەی تاقیکردنەوەی ئامێرەکانی دەنگدان رادەگەیەنێت

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

کۆمسیۆنی باڵای سەربەخۆی هەڵبژاردنەکانی عیراق  وادەی تاقیکردنەوەی ئامێرەکانی دەنگدان و پێدانی ژمارە بە هاوپەیمانی و حزب و کاندیدە سەربەخۆکان رادەگەیەنێت.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکان بە وێبسایتی رەسمیی یەکێتیی نیشتمانیی کوردستان PUKMEDIA  ی راگەیاند: "کۆمسیۆنی هەڵبژاردنەکان لە 10ی ئابی 2025 یەکەمین تاقیکردنەوە بۆ ئامێرەکانی دەنگدان، لە ھەزار و 79 بنکەی دەنگدان ئەنجام دەدات".

" تاقیکردنەوەکە لەسەرجەم پارێزگاکانی عیراق لەیەک کاتدا ئەنجام دەدرێت و 20 دەنگدەر تاقیکردنەوەکە ئەنجام دەدەن"، جومانە غەلای وایوت.

وتەبێژی کۆمسیۆنی باڵای سەربەخۆی هەڵبژاردنەکانی عیراق ئاماژەی بەوەشکرد:" رۆژی 9ی ئابی 2025 تیروپشک بۆ پێدانی ژمارە بە هاوپەیمانی و حزب و کاندیدە سەربەخۆکان دەکرێت".

راشیگەیاند:" کۆمسیۆن بەردەوامە لەبەراوردکردن و شیکردنەوەی ناوی ئەو دەنگدەرانەی کە لەساڵی 2024 و 2025 دا خۆیان تۆمارکردووە، لەئێستادا دەستمانکردووە بە ناردنی زانیارییەکانیان بۆ کۆمپانیای تایبەتمەند بە چاپکردنی کارتی بایۆمەتریی و دوای تەواوبوونیشی لە ٩ی ئەیلول کارتەکانیان پێدەدرێتەوە".



ئەمەش لە کاتێکدایە، رۆژی 9ی4ی2025 ئەنجومەنی وەزیرانی عیراق بە زۆرینەی دەنگ، 11ـی 11ـی 2025ـی وەك ڕۆژی هەڵبژاردنی داهاتووی ئەنجومەنی نوێنەرانی عیراق دیاریكرد.

PUKMEDIA