داوادەکرێت مووچە بۆ توشبووانى شێرپەنجە دابینبکرێت

میدیاکان

هێماى شێرپەنجە

لیژنەى تەندروستى لە ئەنجومەنى نوێنەرانى عیراق پڕۆژەیاسایەکیان لەبارەى دابینکردنى مووچە بۆ توشبووانى شێرپەنجە ئامادەکردووە و پێشکەش بە سەرۆکایەتى ئەنجومەنەکەى دەکەن، ئەندامێکى لیژنەکەش دەڵێت: "جگە لە داواکردنى مووچە بۆ نەخۆشانى شێرپەنجە هاوکات داوامان کردووە توشبووان لەسەر ئەرکى حکومەت فەریزەى حەج ئەنجامبدەن".

خەدیجە وادى ئەندامى لیژنەى تەندروستى لە ئەنجومەنى نوێنەرانى عیراق بە وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "لە پێناو باشترکردنى ژیانى توشبووانى شێرپەنجە پڕۆژەیاسایەکمان ئامادەکردووە و پێشکەشى سەرۆکایەتى ئەنجومەنەکەى دەکەین، بۆ ئەوەى بخرێتە کارنامەى دانیشتنەکانى داهاتووى ئەنجومەنەکەوە کە تێیدا داوامان کردووە مانگانە بڕێک پارەى دیاریکراو وەک مووچە بدرێتە ئەو کەسانەى کە توشبووى نەخۆشى شێرپەنجەن".

"ئامانج لەم پڕۆژەیەمان خزمەتێکى بچووکە بە توشبووانى شێرپەنجە، چونکە ئەو نەخۆشانە پێویستییان بە خەرجییەکى زۆرە بۆ پێداویستییە تەندروستییەکانیان و ئەرکى حکومەتە هاوکاریان بێت، هاوکات پڕۆژەیاساکە کۆدەنگى زۆربەى فراکسیۆنەکانى لەسەرە و هەموو هەوڵێک دەدەین لە پێناو خزمەتى توشبووان"، خەدیجە وادى وا دەڵێت.

ئاماژەى بەوەشدا: "پڕۆژەکە تەنها دابینکردنى مووچەیەکى مانگانەى لەخۆ نەگرتووە، بەڵکو چەندین خاڵى دیکەى تێدایە کە لە خزمەت توشبووانى شێرپەنجەدایە، وەک داوامان کردووە هەموو توشبوویەک ئەگەر خواستى هەبێت لەسەر ئەرکى حکومەت فەریزەى حەج جێبەجێ بکەن، کە ئەمەش لە رووى رووحیەوە هاوکاریەکى باش دەبێت بۆ توشبووان".  

بە پێى زانیاریەکانى PUKMEDIA  ئەگەر پڕۆژەیاساکە لە پەرلەمان دەنگى لەسەر درا بڕیارە لە کەربەلاوە دەست بە جێبەجێکردنى بکرێت، هاوکات خەدیجە وادى ئەندامى لیژنەى تەندروستى لە ئەنجومەنى نوێنەرانى عیراق رایدەگەیەنێت: "داواکارییەکەمان لە پێناو خزمەتى سەرجەم توشبووانى شێرپەنجەیە لە عیراق بە پارێزگاکانى هەرێمى کوردستانیشەوە، کە هیوادارین هەموو لایەک هاوکار بن بۆ ئەوەى پێکەوە بتوانین بەشێک لە خەمى توشبووانى شێرپەنجە کەمبکەینەوە".

شێرپەنجە ناوێكی گشتییە كە زیاتر لە 100 جۆر لەخۆدەگرێت و هەموو جۆرەکانى لەیەك خاڵدا هاوبەشن ئەویش ئەوەیە هەموویان تێكچوونی پڕۆسەی سیستمی دابەشبوونی خانەكانیان هەیە.

دیارترین جۆرەکانى شێرپەنجە ئەمانەن:

- شێرپەنجەی سییەكان.
- شێرپەنجەی خوێن.
- شێرپەنجەی ریخۆڵەی گەورە.
- شێرپەنجەی مەمك.
- شێرپەنجەی پڕۆستات.

PUKMEDIA