سەرۆككۆمار بۆ راگەیاندنی یەكێتی: پێویستە میدیا پابەندو بەرپرسیاربێت

نوسینگەی ڕاگەیاندنی سەرۆكی فراكسیۆنی یەکێتی لە ئەنجومەنی نوێنەران

پێشوازی سەرۆككۆمار لە وەفدی مەكتەبی راگەیاندن و بیرو هۆشیاری یەكێتی

د لەتیف جەمال رەشید، سەرۆككۆماری عیراق، پێشوازی لە وەفدێكی مەكتەبی راگەیاندن و بیرو هۆشیاری یەكێتیی نیشتمانیی كوردستان كرد و جەختی لەسەر گرنگی رۆڵی میدیا لە بەرەوپێشبردنی یەكڕیزی نیشتمانی و ئاشتی كۆمەڵایەتیدا كردەوە.

لە میانی دیدارەكەدا كە ئەمڕۆ سێ شەممە 5ی 8ی 2025،  لە كۆشكی بەغدا بەڕێوەچوو،  باس لە بارودۆخی ئێستای عیراق و ناوچەكە كرا، هەروەها گرنگی هەوڵە هاوبەشەكان بۆ پتەوكردنی یەكڕیزی نیشتمانی بۆ ڕوبەڕوبوونەوەی ئاستەنگەكانی ئێستا تاوتوێكران.

سەرۆككۆمار جەختیكردەوە كە چارەسەركردنی ئەو ناكۆكییانەی  لە نێوان حكومەتی فیدراڵی و هەرێمی كوردستاندان لە رێگەی پابەندبوون بە لێكتێگەیشتنی هاوبەش بەدی دێت كە خزمەت بە سەقامگیریی عیراق دەكات و بەرەوپێشبردنی پڕۆسەی بنیاتنانەوە و پێشكەوتن بكات.

سەرۆككۆمار روناكی خستە سەر ئەو ئەرك و بەرپرسیارێتیانەی كە لەم قۆناغە هەستیارەدا بە میدیاكان سپێردراون و داوای پابەندبوون بە پیشەیی و بابەتگەرایی كرد لە گواستنەوەی رووداوەكان و داڕشتنی بیروڕای گشتی و رێنماییەكان بۆ برەودان بە ئاشتی كۆمەڵایەتی لە چوارچێوەی وتارێكی عەقڵانی و هەستكردن بە هاووڵاتیبوون دوور لە بیری تەسك.

لای خۆیانەوە ئەندامانی وەفدی مەكتەبی راگەیاندن و بیر و هۆشیاری سوپاس و پێزانینی خۆیان بۆ سەرۆككۆمار دەربڕی بۆ روونكردنەوە و تێبینییە بەنرخەكانی، هاوكات پشتیوانی خۆیان بۆ میدیای نیشتمانیی ئامانجدار و چەسپاندنی ئاسایش و سەقامگیری و پاراستنی یەكێتی نیشتمانی دووپاتكردەوە.

PUKMEDIA