تاكۆتایی ساڵی داهاتوو هاوكاریی هاوپەیمانان بەردەوامدەبێت

PUKMEDIA

مووچەی هێزەکانی پێشمەرگە

ئەمینداری گشتیی وەزارەتی پێشمەرگەی هەرێمی کوردستان رایگەیاند،تاكۆتایی ساڵی داهاتوو هاوكاریی هاوپەیمانان بۆ هێزەکانی پێشمەرگە بەردەوامدەبێت.

بەختیار محەمەد ئەمینداری گشتیی وەزارەتی پێشمەرگە بە PUKMEDIA ی راگەیاند:" تا كۆتایی ساڵی 2026 هاوكاریی هێزەكانی هاوپەیمانان، بۆ هێزەكانی پێشمەرگە بەردەوامدەبێت". 

راشیگەیاند، یاداشتنامەیەك لەنێوان پێشمەرگە و وەزارەتی بەرگری ئەمریكا پێنتاگۆن ئیمزاكراوە، كە بەپێی ئەو یاداشتە تا كۆتایی ساڵی 2026 هاوكاریی هێزەكانی هاوپەیمانان بۆ هێزەكانی پێشمەرگە بەردەوامدەبێت.

پەیوەست بە جۆری هاوکارییەکان، ئەمینداری گشتیی وەزارەتی پێشمەرگەی رایگەیاندووە،هاوكارییەكانی هاوپەیمانان لە هاوكاریی دارایی و مەشق و خۆراك خۆیان دەبیننەوە ، رەنگە جۆری هاوكارییەكان گۆڕانكاریی تێدابكرێت، بەڵام بەردەوامدەبێت.

دەربارەی دەنگۆی کەمبوونەوەی بڕی هاوکارییەکە، بەختیار محەمەد ئەمینداری گشتیی وەزارەتی پێشمەرگە رایگەیاند:" بڕەکە وەک خۆیەتی و گۆڕانکاری بەسەردا نەهاتووە، بەڵام بەهۆی ئەوەی بەردەوام لیواکانی پێشمەرگە دەخرێنە سەر وەزارەت، بڕەکەی بۆ پێشمەرگە کەمدەبێتەوە،چونکە بڕی هاوکارییەکە جێگیرە و ژمارەی پێشمەرگە زیاد دەکات".

ئەمەش لە کاتێکدایە، رۆژی7ی8ی2025، هاوكاریی دارایی هاوپەیمانان بۆ مانگی حەوت بەسەر وەزارەتی پێشمەرگەدا دابەشکرا و زیاتر لە 74 هەزار سوودمەند لە لیوا هاوبەشەكانی هێزەكانی پێشمەرگە هاوكارییەكان وەرگرت.

PUKMEDIA