هه‌رێم و عیراق له‌سه‌ر هه‌نارده‌كردنه‌وه‌ی نه‌وت رێككه‌وتن

ميدياكان

كاركردن لە كێڵگەیەكی نەوت

وەزارەتی سامانە سروشتییەكان لە راگەیەندراوێكدا ئاماژە بەوەدەكات: "لەگەڵ وەزارەتی نەوتی عیراق لە سەر میكانیزمی  هەناردەكردنەوەی نەوت رێككەوتوون و رێككەوتنەكەش بە گوێرەی بەرهەمی رۆژانەی كێڵگە نەوتییەكانی هەرێم دەبێت، پاش ئەوەی 50 هەزار بەرمیل بۆ پێویستی ناوخۆی هەرێم گلدەدرێتەوە و بەرهەمەكەی دیكەش بۆ هەناردەكردن رادەستی  كۆمپانیای سۆمۆ دەكرێت".

دەقی راگەیەندراوەكە:

وەزارەتی سامانە سروشتییەكانی حكومەتی هەرێمی كوردستان و وەزارەتی نەوتی عیراق لە سەر میكانیزمی  هەناردەكردنەوەی نەوت رێككەوتن.

 وەزارەتی سامانە سروشتییەكانی حكومەتی هەرێمی كوردستان و وەزارەتی نەوتی عیراق لە سەر میكانیزمی  هەناردەكردنەوەی نەوت رێككەوتن و كۆنووسی رێككەوتنەكەش لەلایەن 23 كەسایەتی وەفدی هەردوولا ئیمزا كراوە 17 ئەندامی وەفدی وەزارەتی نەوتی عیراق بوون.  

كۆبوونەوەكان لە 17 مانگی 7 دەستیانپێكرد و لەم ماوەیە سەردانی تەواوی كێڵگەكانی هەرێم كراوە و دوای هەڵسەنگاندنی كێشەكانی هونەری گفتوگویەكی زۆر، لە 11ی مانگی 8 رێككەوتن لە سەرمیكانیزمی هەناردەكردنی نەوتی كێڵگەكانی هەرێم كراوە، كە بە گوێرەی بەرهەمی رۆژانەی كێڵگە نەوتییەكانی هەرێمی كوردستان دەبێت، ئەویش دوای ئەوەی 50 هەزار بەرمیل بۆ پێویستی ناوخۆی هەرێم گلدەدرێتەوە، بەرهەمەكەی دیكە بۆ هەناردەكردن رادەستی  كۆمپانیای سۆمۆ دەكرێت.

هەروەها بۆ دەستپێكردنەوەی هەناردەی نەوتی هەرێمی كوردستان ماوەتەوە حكومەتی فیدراڵ لەگەڵ حكومەتی توركیا  قسە بكات و پڕۆسەكە جێبەجێ بكرێت.

وەزارەتی سامانە سروشتییەكان

PUKMEDIA