کۆمسیۆن 98 کاندید لە هەڵبژاردنی ئەنجومەنی نوێنەران دووردەخاتەوە

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق بەردەوامە لە پێداچوونەوە بە لیستی کاندیدەکانی هەڵبژاردنی ئەنجومەنی نوێنەران و لە دواین رێکاریدا 98 کاندیدی دوورخستەوە.

عیماد جەمیل سەرۆکی تیمی راگەیاندنی کۆمسیۆنی باڵای سەربەخۆی هەڵبژاردنەکانی عیراق رایگەیاند:" ئەنجومەنی کۆمسیاران بڕیاریدا 98 کاندید بۆ کێبڕکێ لە هەڵبژاردنی ئەنجومەنی نوێنەرانی عیراق دووربخاتەوە".

"كاندیدە دوورخراوەکان بەهۆی سەرپێچیكردنی دەقی ماددەی (7/ سێیەم) لە یاسای هەڵبژاردنی ئەنجومەنی نوێنەران و ئەنجومەنی پارێزگاو قەزاكان ژمارە (12) ساڵی 2018 دورخراونەتەوە"، عیماد جەمیل وایوت.

پێشتریش جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق، رایگەیاند: "160 هاوپەیمانی و حزب و لیستی تاكەكەسی، لیستی ناوی كاندیدەكانیان بۆ بەشداریكردن لە هەڵبژاردنی ئەنجومەنی نوێنەران پێشكەش كردووە".

یەكێتیی نیشتمانیی كوردستان-یش بۆ بەشداریكردن لە هەڵبژاردنی ئەنجومەنی نوێنەرانی عیراق، نزیكەی 200 كاندیدی لەسەر ئاستی پارێزگاكانی هەولێر، سلێمانی، دهۆك، كەركوك، نەینەوا، دیالە، سەلاحەدین و بەغدا هەیە.

ئەمەش لە كاتێكدایە، ئەنجومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد، لەبەرئەوە ناوی لیست و قەوارەکان پێشکەش بە کۆمسیۆن کراوە و چاوەڕوانی کۆتایی رێکارەکانن، تاوەکو دەست بە بانگەشە بکەن.

PUKMEDIA