گەورەترین گۆڕی بەکۆمەڵ لە باشووری موسڵ هەڵدەدرێتەوە

راگەیاندنی دەزگای شەهیدانی عیراق

ساتی هەڵدانەوەی گۆڕەکان

بەڕێوەبەرایەتی کاروبار و پاراستنی گۆڕەبەکۆمەڵەکان، دەستپێکردنی هەڵدانەوەی گۆڕستانی خەسفە لە باشووری موسڵ رادەگەیەنێت.

لەڕاگەیەندراوێکدا بەڕێوەبەرایەتی کاروبار و پاراستنی گۆڕەبەکۆمەڵەکان رایگەیاند: تیمی تایبەتمەندی بەشی کاروبار و پاراستنی گۆڕە بەکۆمەڵەکان کە سەر بە دەزگای شەهیدانن، دەستیان بە کاری هەڵدانەوەی گۆڕستانی خەسفە لە باشووری موسڵ کردووە".

راشیگەیاندووە:" گۆڕستانەکە ئەو قوربانیانەی تێدایە، کە لەلایەن رێکخراوی تیرۆریستی داعش-ەوە لە کاتی کۆنترۆڵکردنی موسڵدا شەهیدکراون، هاوکات گەورەترین گۆڕە لە نێو گۆڕە بەکۆمەڵەکاندا".

هەر لەڕاگەیەندراوەکەدا ئاماژە بەوەشکراوە:" ئەو پاشماوانەی دۆزراونەتەوە ڕادەستی بەشی پزیشکی دادوەری دەکرێن بۆ پشکنینی پێویست و تەواوکردنی رێکارەکانی هاوتاکردنی شانەکانی خوێن لەگەڵ خێزانی قوربانییەکان، لە چوارچێوەیەکی یاسایی و مرۆیی و لەژێر چاودێری دەسەڵاتی دادوەری و ئەمنی و پزیشکی و تەکنیکی کارامەدا".

گۆڕستانی خەسفە کارەساتبارترین شایەتحاڵی تاوانەکانی رێکخراوی تیرۆریستیی داعشە لە عیراق و یەکێکە لە دیارترین شوێنەکانی جینۆساید.

PUKMEDIA