جارێكی دیكه‌ سزا بەسەر رۆژنامه‌نووس شیروان شیروانیدا سه‌پێندرایەوە

ئەرشیف

رۆژنامه‌نووس شێروان شێروانی

ئه‌مڕ‌ۆ 19ی 8ی 2025 له‌ دادگای كه‌تنی بنه‌سڵاوه‌، رۆژنامه‌نووس شێروان شێروانی جارێكی دیكه‌ به‌ زیاتر له‌چوار ساڵی دیكه‌ زیندانی سزادرایەوە و له‌كاتی دادگاییه‌كه‌شدا گرژیی دروستبوو.

محه‌مه‌د عه‌بدوڵڵا یه‌كێك له‌پارێزه‌رانی رۆژنامه‌نووس شێروان شێروانی له‌كۆنگره‌یه‌كی رۆژنامه‌وانیدا رایگه‌یاند: له‌سه‌ر سكاڵایه‌ك كه‌ له‌لایه‌ن پله‌دارێكی سه‌ربازیی به‌ تۆمه‌تی هه‌ڕ‌ه‌شه‌كردن له‌خۆی و خێزانه‌كه‌ی له‌سه‌ر شێروان شێروانی تۆماركرابوو، دادگا چوار ساڵ و 5 مانگی دیكه‌ی زیندانی به‌سه‌ر شێروانی شیروانی-دا سه‌پاند.

پارێزه‌ره‌كه‌ی شێروانی ئاماژه‌ی به‌وه‌شكرد: پێویسته‌ پاراستنی ئاسایشی چاكسازییه‌كان به‌ پۆلیس بسپێردرێت، به‌ڵام ئه‌و ئه‌ركه‌ به‌ زێره‌ڤانی سپێردراوه‌و زانیاریشمان به‌ده‌ستگه‌یشتووه‌ سكاڵایه‌كی دیكه‌ له‌دژی شێروان شێروانی ده‌جوڵێندرێت.

به‌پێی زانیارییه‌كان له‌دادگاكه‌دا هێزێكی ئه‌منی زۆر بڵاوه‌ی پێكراوه‌ و گرژیی و ده‌مه‌قاڵێ دروستبووه‌.

شێروان شێروانی له‌ 7ی تشرینی یه‌كه‌می ساڵی 2020 له‌گه‌ڵ ژماره‌یه‌ك رۆژنامه‌وان و چالاكوانی بادینان ده‌ستگیركرا، پاش چه‌ند مانگێك له‌ ده‌ستگیركردنیان، دادگای تاوانی هه‌ولێر رۆژی 16ی شوباتی 2021 به‌تۆمه‌تی "تێكدانی ئاسایشی نیشتمانی"، هه‌ریه‌ك له‌ شێروان شێروانی، ئه‌یاز كه‌ره‌م، گوهدار محه‌مه‌دئه‌مین، هاریوان عیسا و شڤان سه‌عیدی به‌شه‌ش ساڵ زیندانی بۆ هه‌ریه‌كه‌یان سزادا.

PUKMEDIA