کۆمسیۆن 470 کاندید لە هەڵبژاردنی ئەنجومەنی نوێنەران دووردەخاتەوە

PUKMEDIA

پڕۆسەی دەنگدان

كۆمسیۆنی باڵای سەربەخۆی هەڵبژاردنەكانی عیراق بەردەوامە لە پێداچوونەوە بە لیستی كاندیدەكانی هەڵبژاردنی ئەنجومەنی نوێنەران و لە دواین رێكاریدا 253 كاندیدی دوورخستەوە، بەمەش ژمارەی كاندیدانی دوورخراوە گەیشتووەتە 470 كەس. 

ئەمڕۆ سێشەممە 19ی ئابی 2025، ئاژانسی هەواڵی رەسمی عیراق، لە زاری حەسەن قەبەس، ئەندامی تیمی راگەیاندنی كۆمسیۆنەوە رایگەیاند: ژمارەی ئەو كاندیدانەی تا ئێستا بۆ هەڵبژاردنی ئەنجومەنی نوێنەران دوورخراونەتەوە گەیشتووەتە زیاتر لە 470 كەس و لە دواین رێكاریشدا، كۆمسیۆن 253 كاندیدی دوورخستەوە.


حەسەن قەبەس راشیگەیاندووە: بەپێی یاسا، دوای ئەوەی حزبەكە لە دوورخستنەوەی كاندیدەكەی ئاگاداردەكرێتەوە، سێ رۆژ مۆڵەتی پێدەدرێت بۆ گۆڕینی كاندیدی دوورخراوە و دانانی كەسێكی دیكە لەجێگای، هاوكات كۆمسیۆن دەزگایەكی بێلایەنە و بەرژەوەندیی لە دوورخستنەوەی هیچ كاندیدێكدا نییە، هەربۆیە كاندید مافی ئەوەی هەیە لەبەردەم دەسەڵاتی دادوەریدا تانە لە بڕیارەكە بدات.

ئەمەش لە كاتێكدایە، ئەنجومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد، لەبەرئەوە ناوی لیست و قەوارەکان پێشکەش بە کۆمسیۆن کراوە و چاوەڕوانی کۆتایی رێکارەکانن، تاوەکو دەست بە بانگەشە بکەن.

PUKMEDIA