لیژنەیەك بۆ چاودێریی هەڵمەتی پێشوەختەی هەڵبژاردن پێكدەهێنرێت

PUKMEDIA

لۆگۆى کۆمسیۆن

كۆمیسیۆنی باڵای سەربەخۆی هەڵبژاردنەكانی عیراق ئاشكرایكرد، لیژنەیەكیان پێكهێناوە بۆ چاودێریكردنی هەڵواسینی پۆستەر و وێنەی ئەو كاندیدانەی كە بۆ هەڵبژاردنەكانی ئەنجومەنی نوێنەران خۆیان کاندید کردووە و  بەر لەوادەی خۆی دەستیان بە هەڵمەتی بانگەشە كردووە.

نیبراس ئەبو سودە، یاردەدەری وتەبێژی كۆمیسیۆنی باڵای سەربەخۆی هەڵبژاردنەكانی عیراق رایگەیاند، بڵاوكردنەوەی پۆستەر و وێنەی كاندیدەكان بۆ هەڵبژاردنی داهاتووی ئەنجومەنی نوێنەران، بەر لەوادەی رەسمیی هەڵمەتی هەڵبژاردن، بە سەرپێچیكردنی یاسا ئەژمار دەكرێت.

وتیشی، كۆمیسیۆن لیژنەیەكی تایبەتی بۆ هەڵواسینی پۆستەر و وێنەی كاندیدەكان دروستكردووەو راپۆرتی خۆی بەرز دەكاتەوە بۆ ئەنجومەنی كۆمیسیاران، دووپاتیشیكردەوە، هەموو جۆرە حاڵەتێكی بانگەشەی پێشوەختە بە سەرپێچی یاساو رێنماییەكان دادەنرێت و پێویستە كاندیدەكان پابەندی پێورەكانی هەڵبژاردن بن.

ئەمەش لەکاتێکدایە، کۆمسیۆنی باڵای سەربەخۆی هەڵبژاردنەکانی عیراق، بەردەوامە لە ئامادەکارییەکانی بۆ هەڵبژاردنی ئەنجومەنی نوێنەرانی عیراق، لەوچوارچێوەیەشدا ئەو کاندیدانە دووردەخاتەوە ئەو مەرجانەیان تێدا نییە، کە کۆمسیۆن بۆ خۆکاندیدکردن دایناون.

PUKMEDIA