پەرلەمانتارێکی یەکێتی: رزگاربووانی كیمیاباران و ئەنفال ئیمتیازاتی زیندانی سیاسییان پێدەدرێت

PUKMEDIA

بەدرییە حسێن ئەندامی ئەنجومەنی نوێنەرانی عیراق لەفراکسیۆنی یەکێتی

لە دانیشتنی ئەمڕۆیدا ئەنجومەنی نوێنەرانی عیراق دەنگی لەسەر لیستی باڵیۆزەکانی عیراق و چەند پرۆژە یاسایەک دا و پەرلەمانتارێکی یەکێتیش رایدەگەیەنێت: لەمەودوا رزگاربووانی كیمیابارانی هەڵەبجە و شاڵاوەكانی ئەنفال، كە ناچاربوون  پەنا بۆ كۆماری ئیسلامی ئێران ببەن، هەموو ئەو ماف و ئیمتیازاتانە دەیانگرێتەوە كە بە زیندانیانی سیاسی عیراق دراوە.

  بدریە حاجی حسین ئەندامی ئەنجومەنی نوێنەرانی عیراق لە فراکسیۆنی یەکێتی بە PUKMEDIA ی راگەیاند: لەسەرەتای دانیشتنەکەدا ئەنجومەنی نوێنەران دەنگی لەسەر لیستی 93 باڵیۆز دا کە لەلایەن دیوانی سەرۆکایەتی حکومەتەوە نێردراوبوون.
راشیگەیاند: دەنگ درا لەسەر یاسای پێشنیارکراوی هەموارکردنەوەی یەکەم یاسای بنەماکانی هاوتابوونی بڕوانامە و بڕوانامەی ئەکادیمیی عەرەبی و بیانی ژمارە (20)ی ساڵی 2020، کە لەلایەن لیژنەی خوێندنی باڵا و توێژینەوەی زانستییەوە پێشکەش کراوە، بۆ پاراستنی کوالیتی ئەکادیمی.

پەرلەمانتارەکەی یەکێتی ئاماژەی بەوەشکرد: ئەنجومەن دەنگی لەسەر پێشنیاری هەموارکردنەوەی دووەمی یاسای دامەزراوەی زیندانیانی سیاسی ژمارە (4)ی ساڵی 2006دا، کە لەلایەن لیژنەی شەهیدان و قوربانییان و لیژنەی یاساییەوە پێشکەشکرا  کە سەرجەم رزگاربووانی كیمیابارانی هەڵەبجە و شاڵاوەكانی ئەنفال، كە لە ئەنجامی هەڕەشەكانی رژێمی عیراق ناچاربوون پەنا بۆ كۆماری ئیسلامی ئێران ببەن، هەموو ئەو ماف و ئیمتیازاتانە دەیانگرێتەوە كە بە زیندانیانی سیاسی عیراق دراوە.

PUKMEDIA