كۆمیسیۆن: هەڵبژاردن لە 8 هەزار بنكە و 39 هەزار وێستگە دەكرێت

واع

پرۆسەی دەنگدان

کۆمسیۆنی باڵای سەربەخۆی هەڵبژاردنەکانی عیراق لە ئامادەکارییەکانی بۆ هەڵبژاردنی ئەنجومەنی نوێنەران بەردەوامە و وتەبێژەکەشی رایدەگەیەنێت ژمارەی بنکەکانی دەنگدان زیاتر لە هەشت هەزار بنکەیە.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عیراق، راگەیاند، ژمارەی بنكەكانی دەنگدانی پەسەندكراو هەشت هەزار و  703 بنكەن و كۆی ژمارەی وێستگەكانی دەنگدانیش 39 هەزار و 285 وێستگەیە.

وتیشی، لە هەر وێستگەیەكی دەنگدان 550 دەنگدەر دەتوانن دەنگ بدەن، ئەوەش بە ئامانجی رێكخستن و ئاسانكردنی پرۆسەی دەنگدان بۆ دەنگدەران. كۆی گشتیی ژمارەی دەنگدەرانی تۆماركراو لە تۆماری گشتیی دەنگداندا 20,063,773 كەسە.

لە بارەی ئامادەکارییەکانی دیکەشەوە، نیبراس ئه‌بو سۆدە، یاریدەدەری وتەبێژی کۆمسیۆنی هەڵبژاردنەکانی عیراق رایگەیاند:هەموو کارە گرنگەکان تەواو کراون، بەڵام هێشتا هەندێکی کاری دیکەی وەک چاپکردنی کارتی دەنگدان وکارتی بایۆمەتری.
ئاماژەی بەوەشکرد:کارتی بایۆمەتری لە نیوەی ئەم مانگەدا دەگاتە کۆمسیۆن، سەرەتا وردبینیان بۆ دەکرێت و پاشان بەسەر پارێزگاکاندا دابەشدەکرێن.

وتیشی: کارتی دەنگدان بەپێی تایبەتمەندی پارێزگاکان دیزاین کراون.

ئەبو سۆدە ئاماژەی بەوەشکرد: ئەنجامە بەراییەکان لە 24 سەعاتی دوای تەواوبوونی دەنگدان رادەگەیەنرێت، دواتر وردبینی بۆ دەکرێت و تانەکان وەردەگیرێن، دوای تەواوبوونی رێکارەکانیش ئەنجامی کۆتایی رادەگەیەنرێت.

پەیوەست بەو کاندیدانی دوای 4ی9ی2025، دووردەخرێنەوە، نیبراس ئەبو سۆدە رایگەیاند:ئەو کاندیدانەی  پاش بەروارى 4ی ئەیلول دووردەخرێنەوە، حزبەکانیان ناتوانن جێگرەوەیان بۆ دابنێن، هۆکارەکەشی بۆ ئەوە گەڕاندەوە کە لەڕوویی هونەرییەوە پاش ئەو بەروارە ناتوانن جێگرەوە دابنێن.

PUKMEDIA