بکوژی دایک و کچەکەی هەڵەبجە دەستگیرکرا

PUKMEDIA

لۆگۆى ئاسایش

ئاسایش ئەمشەو ئەو تۆمەتبارەى دەستگیرکرد، کە کچ و خێزانەکەى خۆى لە هەڵەبجە دەکوژێت.

لەڕاگەیەنراوێکدا کە وێنەیەکی بۆ PUKMEDIA نێردراوە، بەڕێوەبەرایەتی ئاسایشی سلێمانى رایگەیاندووە:"بەڕێوەبەرایەتی ئاسایشی شارەزوور ئەو تۆمەتبارەی دەستگیرکرد کە ئەمشەو 6ى9ى2025 لەپارێزگای هەڵەبجە بەهۆکاری کێشەی کۆمەڵایەتی کچ و خێزانەکەی خۆی دەکوژێت و دوای رووداوەکە هەڵدێت".

لەڕاگەیەنراوەکەدا ئەوەش هاتووە:"ئاسایشی شارەزوور بەبڕیاری دادوەری لێکۆڵینەوە دەستبەجێ بەدواداچوون و لێکۆڵینەوەی ئەنجامدا، بەلێهاتووی کارمەندانی ئاسایش لەماوەی کەمتر لە 2 کاتژمێردا توانیان دەستگیری بکەن، هەرچەندە لەکاتی دەستگیرکردندا تۆمەتبار هەوڵی خۆکوشتنی دابوو".

ئەوەشخراوەتەڕوو: "لەئێستادا تۆمەتباری بکوژ دەستگیرکراوە و لێکۆڵینەوە لە رووداوەکە بەردەوامە".

PUKMEDIA