به‌ڕ‌ێوه‌به‌ری كۆمپانیای سۆمۆ: به‌غدا ره‌زامه‌نده‌ به‌كه‌مكردنه‌وه‌ی هه‌نارده‌ی نه‌وتی هه‌رێم

PUKMEDIA

نەوتی هەرێمی کوردستان

به‌ڕ‌ێوه‌به‌ری كۆمپانیای سۆمۆ رایده‌گه‌یه‌نێت، هه‌ریه‌كه‌ له‌ حكومه‌تی هه‌رێم و عیراق لیكتێگه‌یشتنی باشییان هه‌یه‌ بۆ هه‌نارده‌كردنه‌وه‌ی نه‌وتی هه‌رێم و توركیاش ره‌زامه‌ندی ده‌ربڕ‌یوه‌.

ئه‌مڕ‌ۆ یه‌كشه‌ممه‌ 7ی ئه‌یلولی 2025، عه‌لی نزار، به‌رێوه‌به‌ری كۆمپانیای سۆمۆ رایگه‌یاندوه‌: له‌سه‌ر پرسی هه‌نارده‌كردنه‌وه‌ی نه‌وتی هه‌رێم هه‌ریه‌كه‌ له‌حكومه‌تی عیراق و هه‌رێم لێكتێگه‌یشتنی باشیان هه‌یه‌ و به‌غدا ره‌زامه‌نده‌ له‌سه‌ر كه‌مكردنه‌وه‌ی بڕ‌ی هه‌نارده‌كردنی رۆژانه‌ی نه‌وت له‌ 400 هه‌زاره‌وه‌ بۆ 230 هه‌زار به‌رمیل نه‌وتی رۆژانه‌ و ته‌نانه‌ت كه‌متریش به‌هۆی ئه‌وه‌ی رێژه‌ی به‌رهه‌مهێنانی نه‌وتی هه‌رێم كه‌می كردووه‌.

باسی له‌وه‌شكردووه‌: یه‌كێكی دیكه‌ له‌خاڵه‌كانی رێككه‌وتنی نێوان هه‌رێم و عیراق پرسی كۆمپانیا نه‌وتییه‌كانه‌ كه‌ گره‌نتی پێویستییان ده‌وێت بۆ سه‌لامه‌تی كاركردنیان و چه‌ند كێشه‌یه‌كی دیكه‌شیان هه‌یه‌، ئه‌گه‌ر بێت و به‌زووی كێشه‌كانیان چاره‌سه‌ر بكرێت بابه‌ته‌كه‌ له‌ قازانجی هه‌رێم ده‌شكێته‌وه‌و كۆتایی به‌ناكۆكییه‌كان دێت.

هەر لەو بارەیەوە بەهجەت ئەحمەد، پسپۆڕ لە بواری نەوت و وزە بە PUKMEDIA ی رایگەیاندووە: تا ئێستا رێککەوتنی کۆتایی لەسەر هەناردەکردنەوەی نەوتی هەرێم نەکراوە و هۆکاری سەرەکیش کۆمپانیا نەوتییەکانە بەهۆی ئەوەی بەپێچەوانەی پرەنسیبە جیهانییەکانی کاری کۆمپانیاوە کاردەکەن و تێکەڵ بە ململانێی سیاسی بوون و رێککەوتنەکە دوادەخەن.
باسی لەوەشکردووە: بەپێی ئەو گرێبەستانەی پێشتر کراوە کۆمپانیا نەوتییەکان هیچ مافێکیان نییە دەستوەردان بکەن لە هەناردەکردنی نەوتی هەرێم لەرێگەی بەندەری جەیهان و رێککەوتن لەگەڵ عیراق. 

ئه‌مه‌ش له‌كاتێكدایه‌، به‌هۆی ئه‌وه‌ی تائێستا هه‌نارده‌كردنه‌وه‌ی نه‌وتی هه‌رێم ده‌ستیپێنه‌كردووه‌ته‌وه‌ كه‌ یه‌كێكه‌ له‌خاڵه‌ سه‌ره‌كییه‌كانی رێكکه‌وتنی نێوان هه‌ولێر و به‌غدا بۆیه‌ فه‌رمانبه‌رانی هه‌رێم له‌ئه‌مساڵدا ته‌نها شه‌ش مووچه‌یان وه‌رگرتووه‌.


PUKMEDIA