دوو كۆبوونه‌وه‌ی گرنگ له‌باره‌ی داهات و نه‌وتی هه‌رێم له‌به‌غدا به‌ڕێوه‌ده‌چێت

ئەرشیف

کۆبوونەوەی ئەنجومەنی وەزیرانی عیراق

دانوستانه‌كانی نێوان حكومه‌تی هه‌رێمی كوردستان و فیدڕ‌اڵ بۆ رێككه‌وتن له‌سه‌ر داهاتی نانه‌وتی و هه‌نارده‌كردنه‌وه‌ی نه‌وت به‌رده‌وامی هه‌یه‌ و ئه‌مڕ‌ۆش ئه‌نجومه‌نی وه‌زیرانی عیراق كۆده‌بێته‌وه‌ و ئه‌گه‌ری هه‌یه‌ له‌ناو كۆبوونه‌وه‌كه‌ باس له‌و پرسه‌ بكرێت.

به‌پێی خشته‌ی كۆبوونه‌وه‌كان، بڕ‌یاره‌ ئه‌مڕ‌ۆ ئه‌نجومه‌نی وه‌زیرانی عیراق كۆببێته‌وه‌، چاوه‌ڕ‌وان ده‌كرێت یه‌كلاكردنه‌وه‌ی ناكۆكییه‌كانی تایبه‌ت به‌داهات و نه‌وت له‌گه‌ڵ هه‌رێمی كوردستان به‌شێك بن له‌ته‌وه‌ره‌كانی كۆبوونه‌وه‌كه‌، ئه‌مه‌ش هاوكاته‌ له‌گه‌ڵ كۆبوونه‌وه‌یه‌كی دیكه‌ی هه‌ردوو وه‌فدی دانوستانكاری هه‌رێم و عیراق بۆ گه‌یشتن به‌چاره‌سه‌ركردنی كێشه‌ هه‌ڵپه‌سێردراوه‌كانی په‌یوه‌ست به‌ داهات و هه‌نارده‌ی نه‌وت.

شه‌وی رابردوو محه‌مه‌د شیاع سوودانی، سه‌رۆكوه‌زیرانی عیراق پاش پێشكه‌شكردنی وته‌یه‌ك له‌ كۆبوونه‌وه‌ی ئه‌نجومه‌نی باكووری ئه‌تڵه‌سی، له‌ برۆكسله‌وه‌ گه‌ڕ‌ایه‌وه‌ به‌غداو ئه‌مڕ‌ۆش سه‌رپه‌رشتی كۆبوونه‌وه‌ی ئاسایی ئه‌نجومه‌نی وه‌زیران ده‌كات.

به‌پێی زانیارییه‌كانی  PUKMEDIA چاوه‌ڕ‌وان ده‌كرێت له‌ كۆبوونه‌وه‌كه‌دا ئه‌نجامی گفتوگۆكانی لیژنه‌ هاوبه‌شه‌كانی هه‌ولێر و به‌غدا بۆ چاره‌سه‌ركردنی ناكۆكییه‌كانی په‌یوه‌ست به‌ داهاتی ناوخۆی هه‌رێمی كوردستان و هه‌نارده‌كردنه‌وه‌ی نه‌وت بخرێنه‌ڕ‌وو.

ناكۆكی نێوان هه‌رێمی كوردستان و حكومه‌تی فیدراڵی له‌سه‌ر بڕ‌ی ئه‌و داهاته‌یه‌ كه‌ پێویسته‌ هه‌رێم مانگانه‌ ره‌وانه‌ی به‌غدای بكات، هه‌رچه‌نده‌ له‌ لێكتێگه‌یشتنی نێوانیان بڕ‌یار بوو كه‌ مانگانه‌ 120 ملیار دینار وه‌ك داهاتی نانه‌وتی بخرێته‌ سه‌ر هه‌ژماری وه‌زاره‌تی دارایی فیدڕ‌اڵی، به‌ڵام ئێستا هه‌ردوو لایه‌ن له‌سه‌ر جۆری داهاته‌كه‌ ناكۆكن، به‌شێوه‌یه‌ك هه‌رێمی كوردستان ده‌یه‌وێت ته‌نها 50% داهاتی فیدڕ‌اڵی بدات به‌ به‌غدا، به‌ڵام به‌غدا داوای 50%ی كۆی داهاتی نانه‌وتی ده‌كات، واته‌ داهاتی فه‌رمانگه‌ فیدراڵییه‌كان و فه‌رمانگه‌كانی حكومه‌تی هه‌رێم.

په‌یوه‌ست به‌ هه‌نارده‌كردنه‌وه‌ی نه‌وت، پێشتر كۆمپانیای فرۆشتنی نه‌وتی عیراق ناسراو به‌ (سۆمۆ) ڕ‌ایگه‌یاندبوو له‌گه‌ڵ هه‌رێمی كوردستاندا له‌سه‌ر هه‌نارده‌كردنه‌وه‌ی نه‌وت ڕ‌ێككه‌وتووین، به‌ڵام له‌مپه‌ری هه‌نارده‌كردنه‌وه‌ی نه‌وت كۆمپانیاكانی نه‌وته‌ له‌هه‌رێمی كوردستان.
هاوكات حكومه‌تی به‌غدا، بۆ ره‌وانه‌كردنی مووچه‌ی فه‌رمانبه‌رانی هه‌رێمی كوردستان، مه‌رجی ته‌وتینكردنی مووچه‌ی مووچه‌خۆرانه‌، به‌ڵام وه‌ك داهاتی نانه‌وتی و هه‌نارده‌كردنه‌وه‌ی نه‌وت هێشتا نه‌بووه‌ته‌ پرسێكی گه‌رم له‌نێوان هه‌ردوو لایه‌ندا.

PUKMEDIA