پرسی داهاتی ناوخۆ رەوانەی ئەنجومەنی دەوڵەت كرا

راگەیاندنی ئەنجومەنی وەزیرانی عیراق

كۆبوونەوەی ئەنجومەنی وەزیرانی عیراق

ئەنجومەنی وەزیرانی عیراق بڕیاریدا پرسی داهاتی ناوخۆ رەوانەی ئەنجوومەنی دەوڵەت بكرێت، لەبارەی داهاتی نەوتیشەوە، بڕیاریدا بڕی ئەو نەوتەی كوردستان بەرهەمی دەهێنێت لە رێگەی كۆمپانیای سۆمۆوە بەبازاڕ بكرێت و 50 هەزار بەرمیل نەوتیش بۆ پێداویستی ناوخۆ گل بدرێتەوە.

بەپێی زانیارییەكانی PUKMEDIA، لە كۆبوونەوەكەی ئەمڕۆی ئەنجومەنی وەزیرانی عیراقدا، بڕیاردرا پرسی داهاتی ناوخۆ واتا داهاتی نانەوتی، رەوانەی ئەنجومەنی دەوڵەت بكرێت و لەوێ یەكلایی بكرێتەوە.

هەر بەپێی زانیارییەكانی PUKMEDIA، لەبارەی داهاتی نەوتییەوە، بڕیاردرا سەرجەم ئەو نەوتەی لەلایەن حكومەتی هەرێم و كۆمپانیاكانی نەوتەوە بەرهەم دەهێنرێت، رادەستی وەزارەتی نەوتی عيراق بكرێت و لەلایەن كۆمپانیای سۆمۆوە بەبازاڕ بكرێت، هاوكات لەو بڕەی حكومەتی هەرێم بەرهەمی دەهێنێت 50 هەزار بەرمیل بۆ پێداویستی ناوخۆ گل بدرێتەوە، كە ئەمەش یەكێك بوو لە داواكارییەكانی حكومەتی هەرێم.

ئەمەش لە كاتێكدایە،  ئەو پرسانەی لە بەڕێوەبردنی دەوڵەتدا یەكلایی نابنەوە، ئەنجومەنی دەوڵەت یەكلاییان دەكاتەوە، یاخود چارەسەرێكی دەستووریی و یاساییان بۆ دەدۆزێتەوە، ئەگەر پرسی داهاتی ناوخۆی هەرێم، لە ئەنجومەنی دەوڵەت یەكلایی نەكرایەوە یاخود حكومەتی هەرێم تانەی لە بڕیارەكەدا، ئەوا رەوانەی دادگای باڵای فیدراڵی عیراق دەكرێت.

PUKMEDIA